އިންޑިއާގެ ޕްރައިވެޓް ސެކްޓަރގައި ޖައްވީ ރޭހުގެ ވާދަވެރިކަން އިތުރުވެފައިވަނިކޮށް، ޕިކްސެލް ކުންފުނިން މިއަދު އިތުރު 3 ސެޓެލައިޓް ޖައްވަށް ފޮނުވާލަން ހަމަޖެހިއްޖެއެވެ.

މިއީ އެކުންފުނިން ޖައްވަށް ފޮނުވާ 6 ހައިޕަރސްޕެކްޓްރަލް އިމޭޖިންގ ސެޓެލައިޓްގެ ތެރެއިން 3 ސެޓެލައިޓެވެ. އަނެއް 3 ސެޓެލައިޓް ފޮނުވާލާނީ މިއަހަރުގެ ފަހު ކުއާޓަރގައެވެ. ސެޓެލައިޓްތައް ފޮނުވާލުމަށް ހަމަޖެހިފައިވަނީ މިރޭ ދަންވަރު، ވެންޑަރބާގް ސްޕޭސްފޯސް ބޭސްއިން އުދުއްސާލާ ސްޕޭސް އެކްސްގެ ރޮކެޓެއްގައެވެ. އަދި ސެޓެލައިޓްތައް ދަތުރުކުރާނީ ބިމާއި 550 ކިލޯމީޓަރު މަތިން، ސަން-ސިންކްރޮނައިޒްޑް އޯބިޓެއްގައެވެ.

ޕިކްސެލްއިން ބުނީ އެކުންފުނީގެ ސެޓެލައިޓް ނެޓްވޯކަށް އިތުރު 18 ސެޓެލައިޓް އުފައްދާނެކަމަށެވެ. އިމޭޖިން ސެޓެލައިޓް މާކެޓަކީ 2029 ވަނަ އަހަރުގެ ނިޔަލަށް 19 ބިލިއަން ޑޮލަރަށް އަރާނެ، ވާދަވެރި މާކެޓެއްކަމަށް އަންދާޒާކުރެވެއެވެ. ހައިޕަރސްޕެކްޓްރަލް އިމޭޖިންގ ޓެކްނޮލޮޖީގެ ބޭނުން ދަނޑުވެރިކަމާއި، މައިނިންގއާއި، ދިފާއީ ކަންކަމުގެ އިތުރުން ތިމާވެށީގެ ހާލަތު ދެނެގަތުމަށް ބޭނުންކުރެވޭނެއެވެ. ސެޓެލައިޓް ފޮޓޯގެ ހިދުމަތުގެ އިތުރުން، އެފޮޓޯތައް އެނަލައިޒްކުރުމުގެ ހިދުމަތަކީވެސް ޝައުގުވެރި ދާއިރާއެއްކަމަށް ޕިކްސެލް ކުންފުނިން ބުނެއެވެ.

އެކުންފުނިން ވަނީ މިހާރުވެސް ދުނިޔޭގެ ބޮޑެތި ކުންފުނިތައް ހިމެނޭހެން 65 ކްލަޔަންޓުން ހޯދާފައެވެ. އޭގެތެރޭގައި އެންމެ ބޮޑު އެއް މައިނިންގ ކުންފުނި ރިއޯ ޓިންޓޯއާއި، ބްރިޓިޝް ޕެޓްރޯލިއަމްގެ އިތުރުން އިންޑިއާގެ އެގްރިކަލްޗަރ މިނިސްޓްރީ ހިމެނެއެވެ.

ޕިކްސެލް ކުންފުންޏަކީ ގޫގަލްއިން ފަންޑުކުރާ ކުންފުންޏެކެވެ. އަދި އެކުންފުނީގެ ވެރިޔާ އަވާއިސް އަހްމަދަކީ އުމުރުން 27 އަހަރުގެ ޒުވާނެކެވެ.