ރާއްޖޭގައި ޕޯސްޓްމޯޓަމް ހެދޭނެ އިންތިޒާމު ހަމަޖައްސައިދިނުމަށް އެދި ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ) ގެ ސިޓީއެއް ސިއްހީ ވުޒާރާއަށް ފޮނުވައިފިއެވެ.

ހެލްތް މިނިސްޓަރު އަބްދު ﷲ ނާޒިމްއަށް ފޮނުއްވި މި ސިޓީގައި ޖުމްލަގޮތެއްގައި ކުޑޫ އެދިވަޑައިގެންފައިވަނީ، މި ފަހަކަށް އައިސް ރާއްޖޭގައި ގޮތްނޭނގޭ މަރުތައް ގިނަވަމުންދާތީއެވެ. މި ސިޓީގައި ކުޑޫ ވަނީ ރާއްޖޭގައި ޕޯސްޓްމޯޓަމް ހެދުމަށް ޤާނޫނީގޮތުން ހުރަހެއް ނެތްކަމަށް ފެންނާތީވެ، އެކަން އަވަސްކޮށްދިނުމަށް ހެލްތް މިނިސްޓަރުގެ އަރިހުން އެދިވަޑައިގަންނަވާފައެވެ.

މި ސިޓީގައި ކުޑޫ ވިދާޅުވެފައިވަނީ ގޮތްނޭނގޭ މަރުތައް ގިނަވަމުންދާތީވެ، އެކަމާމެދު ރައްޔިތުން ނިހާޔަތަށް ކަންބޮޑުވުން ފާޅުކުރަމުންދާކަމަށާއި، އެގޮތުން ނިމިގެންދިޔަ ދެމަސްދުވަހުގެ ތެރޭގައި އެކަނިވެސް 7 މީހުން މަރުވެފައިވާކަމަށެވެ. އެހެންކަމުން ޕޯސްޓްމޯޓަމް ހެދޭނެ އިންތިޒާމެއް ހަމަޖައްސައި އެފަދަ މަރުތަކާބެހޭގޮތުން ރައްޔިތުންގެ ހިތުގައި އުފެދޭ ސުވާލުތައް އޮޅުފިލުވައިދޭންޖެހޭކަމަށް ކުޑޫގެ ސިޓީގައި ވަނީ ފާހަގަކޮށްފައެވެ.

ކުޑޫ ވިދާޅުވީ ޕޯސްޓްމޯޓަމް ހެދުމަށް މަރުވާމީހާގެ ހަށިގަނޑު މިހާރު ފޮނުވަނީ ރާއްޖެއިން ބޭރަށް ކަމަށާއި، މިކަމަކީ ދައުލަތުގެ ބައިތުލްމާލުންވެސް ބޮޑެތި ހަރަދުތަކެއް ކުރަންޖެހޭ ކަމެއްކަމަށެވެ. އެގޮތުން ރާއްޖޭގައި ޕޯސްޓްމޯޓަމް ހަދަން ފެށިއްޖެނަމަ ރާއްޖެއިން ބޭރަށް ފޮނުވައިގެން ކުރަންޖެހޭ އެ ހަރަދުތައް ސަލާމަތްވާނޭކަމަށް ކުޑޫ ވިދާޅުވިއެވެ.

ކުޑޫގެ ސިޓީގައި ވަނީ ފުލުހުން އެކުލަވާލާފައިވާ މަރުގެ މައްސަލަތަކުގައި ޕޯސްޓްމޯޓަމް ހެދުމުގައި އަމަލުކުރަންޖެހޭ އިޖުރާއަތްތައް ގެޒެޓްކޮށްފައިވާއިރު، ނޭޝަނަލް ސްޓޭންޑާޑް ފޯ ފޮރެންސިކް މެޑިކަލް ސާރވިސް އިންވެސް އާއްމުކޮށްފައިވާކަމަށެވެ. އެހެންކަމުން ރާއްޖޭގައި ޕޯސްޓްމޯޓަމް ހެދޭނޭ އިންތިޒާމު ވީހާވެސް އަވަހަކަށް ހަމަޖައްސައިދިނުމަށް ކުޑޫގެ ސިޓީގައި ވަނީ އެދިފައެވެ.