ޤައުމީ ކަރަންޓް ކުންފުނި، ސްޓެލްކޯގެ ފޯމަރަކުން ވައްކަންކުރަން އުޅުނުމީހަކު ހުއްޓުވަން އުޅުމުން، އެމީހާ ސްޓެލްކޯގެ މުއައްޒަފަށް ރެންޗަކުން ހަމަލާދީފިއެވެ.

މިކަމާ ގުޅޭގޮތުން ސްޓެލްކޯގެ މެނޭޖިންގ ޑިރެކްޓަރު ހުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، ހުޅުމާލޭގެ ޓްރާންސްފޯމަރަކަށް ގެއްލުންދީ އޭގެން ވައްކަން ކުރަން އުޅުނު މީހަކު އެ ކުންފުނީގެ މުވައްޒަފުން އަތުލައިގަނެފައިވާކަމަށެވެ. ފަހުމީ ވިދާޅުވީ، މިކަމުގެ ތެރޭގައި ފޯމަރުން ވައްކަންކުރަން ވަތްމީހާ ވަނީ އެތަނަށް ދިޔަ މުވައްޒަފުގެ ގައިގައި ރެންޗަކުން ޖަހާ މާރާމާރީ ހިންގާފައި ކަމަށެވެ. މިހާރު އެމީހާ ވަނީ ފުލުހުންނާ ހަވާލުކޮށްފައެވެ.

ފަހުމީ ވިދާޅުވީ، ޓްރާންސްފޯމަރަށް ގެއްލުންދިނުމާއި ގުޅިގެން ހުޅުމާލޭ ދެވަނަ ފިޔަވަހީގެ އެމްޕީއެލް ޓަވަރުތަކުން ވަނީ ކަރަންޓުގެ ހިދުމަތް މެދުކެނޑިފައިވާކަމަށެވެ. މިގޮތުން ކަރަންޓުގެ ހިދުމަތް މެދުކެނޑިފައިވާ ޓަވަރުތަކަށް ވީ އެންމެ އަވަހަކަށް ކަރަންޓު ދިނުމުގެ މަސައްކަތް ކުރަމުންގެންދާކަމަށްވެސް ފަހުމީ ފާހަގަކުރެއްވިއެވެ.

މި ފަހަކަށް އައިސް ސްޓެލްކޯގެ ފޯމަރުތަކުން ވައްކަންކުރުމުގެ މައްސަލަތައް އިތުރުވެފައިވާއިރު، ފޯމަރުތައް ބަހައްޓާފައިހުންނަތަނަށް އެގޮތަށް ވަދެގެންއުޅުމަކީ ވަރަށް ނުރައްކާތެރިކަމެއްކަމަށް ސްޓެލްކޯއިން ވަނީ ބުނެފައެވެ. މިގޮތަށް ފޯމަރުބަހައްޓާފައި ހުރިތަނަކަށް ވަދެ ވައްކަންކުރަން އުޅުމުގެ ތެރޭގައި މިދިޔަ އަހަރުގެ ތެރޭގައި މީހަކު މަރުވެފައިވާއިރު، ސްޓެލްކޯއިން ވަނީ ތަކުރާރުކޮށް އެތަންތަނަށް ވައްކަންކުރަން ނުވަނުމަށް އިލްތިމާސްކޮށްފައެވެ.

ސްޓެލްކޯގެ ފޯމަރު ބަހައްޓާފައި ހުންނަ ތަންތަން ތަޅުލާފައިހުރިނަމަވެސް އެފަދަ ތަންތަނަށް ވަންނަނީ ތަޅު ނުވަތަ އެތަންތަނަށް ވަރަށްބޮޑަށް ގެއްލުންދީ ހަލާކުކޮށްލައިގެންނެވެ.