ގައުމީ ލޯބި އިތުރުކޮށްދީ، މަތިވެރި އަޚުލާގު ދިރުވާ އާލާކޮށްދިނުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިލްތިމާސްކުރައްވައިފިއެވެ.
ރައީސް ޑރ.މުޢިއްޒު މިފަދައިން އިލްތިމާސްކުރެއްވީ ޅެންވެރިންގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ. ރައީސް ޑރ.މުޢިއްޒު ވަނީ ޅެންވެރިންގެ ޝުއޫރުތަކުން ދަރިންގެ ތަރުބިއްޔަތަށް މަގު ދައްކައިދިނުމަށާއި، ގައުމީ ލޯބި އިތުރުކޮށް، މަތިވެރި އަޚުލާގު ދިރުވައި އާލާކޮށްދިނުމަށް އިލްތިމާސްކުރައްވާފައެވެ.
މިއާއިއެކު، ރައީސް ޑރ.މުޢިއްޒުގެ ޕޯސްޓްގައި އެމަނިކުފާނު ވަނީ ޅެންވެރިންގެ ދުވަހުގެ މުނާސަބަތުގައި ދިވެހި ހުރިހައި ޅެންވެރިންނަށް ތަހުނިޔާއާއި ހެޔޮ އެދުންތައް ރައްދު ކުރައްވާފައެވެ.
ކޮންމެ އަހަރެއްގެވެސް ޖެނުއަރީމަހުގެ 15 ވަނަ ދުވަސް ފާހަގަކުރަނީ ޅެންވެރިންގެ ދުވަހުގެ ގޮތުގައެވެ. ރާއްޖޭގައި އެންމެ ފުރަތަމަ ޅެންވެރިންގެ ދުވަހެއް ފާހަގަކޮށްފައިވަނީ، 1989 ވަނަ އަހަރެވެ. މިފަހަރުގެ ޅެންވެރިންގެ ދުވަސް ހާއްސަކޮށްފައިވަނީ، ދިވެހި ބަހުގެ އުސްތާދް، ހ. އާމުލީގެ ނިޝާން ޢިއްޒުއްދީންގެ ޢިއްޒަތުގެ ވެރިޔާ ޢަބްދުﷲ ޞާދިޤަށެވެ.
ޅެންވެރިންގެ ދުވަސް ފާހަގަކުރުމުގެ ގޮތުން ބޭއްވުމަށް ހަމަޖެހިފައިވާ ހާއްސަ ޖަލްސާ ބޭއްވުމަށް ހަމަޖެހިފައިވަނީ، މާދަމާގެ ރެއެވެ.
Advertisement
This content is created and paid for by advertisers and does not involve Voice Journalists
