ސިންގަޕޫރުގެ ރައީސް ތަމަން ޝަންމުގަރަތުނަމް އިންޑިއާއަށް ކުރައްވާ ފުރަމާނަ ދަތުރުފުޅެއްގައި އިއްޔެ އެގައުމަށް ވަޑައިގެންފިއެވެ.

މިއީ ސިންގަޕޫރުގެ ރައީސްކަމާ ހަވާލުވުވަޑައިގަތްފަހުން ތަމަން އިންޑިއާއަށް ކުރައްވާ ފުރަތަމަ ރަސްމީ ދަތުފުފުޅެވެ. މިދަތުރުފުޅުގައި އެމަނިކުފާނަށް ރަސްމީކޮށް މަރުޙަބާ ދެންނެވުން އޮންނާނީ މާދަމާ، އިންޑިއާގެ ރިޔާސީ ގަނޑުވަރު ރަޝްތުރަޕަތީ ބަވަންގައެވެ. ތަމަންގެ މި ދަތުރުފުޅުގައި އިންޑިއާގެ ރައީސް ޑްރޮޕުޑީ މުރްމޫ އާއި އިންޑިއާގެ ބޮޑުވަޒީރު ނަރެންދްރަ މޯދީއާއެކު ރަސްމީ މަޝްވަރާތައް ބާއްވަވާނެއެވެ. އަދި އިންޑިއާގެ ޚާރިޖީ ވަޒީރު ޑރ. ސުބްރަމާނިއަމް ޖައިޝަންކަރު އާއި އެހެނިހެން ވަޒީރުން ތަމަންގެ އަރިހަށް އިހްތިރާމްގެ ޒިޔާރަތްކުރައްވާނެއެވެ.

ތަމަންގެ މި ދަތުރުފުޅުގެ ރަސްމީ ބައި ނިމުމުން، މި މަހުގެ 17 އިން 18 އަށް އިންޑިއާގެ އޮޑިޝާ ސްޓޭޓަށް ވަޑައިގަތުމަށް ވަނީ ހަމަޖެހިފައެވެ.

Advertisement

އިންޑިއާގެ ބޮޑުވަޒީރު ނަރެންދްރަ މޯދީ މިދިޔަ އަހަރުގެ ސެޕްޓެމްބަރު މަހުގެ ކުރީކޮޅު ސިންގަޕޫރަށް ރަސްމީ ދަތުރުފުޅެއް ކުރައްވާފައިވެއެވެ. ސިންގަޕޫރުގެ ރައީސްގެ މި ދަތުރުފުޅަކީ އިންޑިއާއާއި ސިންގަޕޫރާއި ދެމެދު ޑިޕްލޮމެޓިކް ގުޅުން ގާއިމް ކުރެވުނުތާ 60 އަހަރު ފުރުމާއި ގުޅިގެން ހިންގުމަށް ހަމަޖެހިފައިވާ ހަރަކާތްތައް ފެއްޓެވުމުގެ ގޮތުންނާއެކު ކުރައްވާ ދަތުރުފުޅެކެވެ.