ހައްދުފަހަނައަޅާފައިވާ އިސްރާއިލުން ފަލަސްތީނަށް ދީފައިވާ ގެއްލުމުގެ ބަދަލުދޭންޖެހޭކަމަށް ރައީސް މުޙައްމަދު މުޢިއްޒު ވިދާޅުވެއްޖެއެވެ.

އިސްރާއިލުން ޣައްޒާގައި ހިންގަމުންދާ ޤަތުލުޢާއްމު އާދިއްތަ ދުވަހުން ފެށިގެން ހުއްޓާލުމަށް އެއްބަސްވުމަށް އައުމާއި ގުޅިގެން، ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ޣައްޒާގައި 15 މަސްދުވަހުގެ މުއްދަތަށް ހިނގަމުންދިޔަ ޤަތުލްއާއްމު ހުއްޓުމަކަށް އައިސްފައިވާތީ ހިތްހަމަޖެހިވަޑައިގަންނަވާ ކަމަށެވެ. 

ރައީސް މުޢިއްޒު ވަނީ، ޤަތުލުޢާއްމު ހުއްޓުމުގެ އެއްބަސްވުމަށް ވާސިލުވުމަށް މަސައްކަތްކުރި ޤައުމުތަކަށް ދިވެހިރާއްޖެއިން ޝުކުރު އަދާކުރައްވާފައެވެ.

އަދި އެމަނިކުފާނު ވަނީ ހަނގުރާމައިގެ ސަބަބުން ގެދޮރު ދޫކޮށް ދާން މަޖުބޫރުވި މީހުންނަށް އެނބުރި ދިއުމުގެ ފުރުސަތު ދިނުމަށާއި، އިންސާނީ އެހީ ފޯރުކޮށްދިނުމަށް މަގުފަހިކުރުމަށް ބައިނަލްއަޤްވާމީ މުޖުތަމަޢުއަށް ގޮވާލައްވާފައެވެ.

މީގެ އިތުރުން، އިސްރާއީލުގެ އުދުވާނީ ޢަމަލުތަކުގެ ސަބަބުން ލިބުނު ގެއްލުންތަކަށް ފަލަސްތީނަށް ބަދަލު ދިނުމަށް އިސްރާއީލަށް ގޮވާލެއްވިއެވެ. އަދި ފަލަސްތީނު އަލުން ބިނާކުރުމަށް ބޭނުންވާ ކުއްލި އެހީތެރިކަން ފޯރުކޮށްދިނުމަށް ބައިނަލްއަޤްވާމީ މުޖުތަމަޢުއަށް އިލްތިމާސް ކުރެއްވިއެވެ.

އިޒްރޭލުން ފަލަސްތީނުގެ ޢައްޒާއަށް ދެމުންގެންދާ ހަމަލާތައް ހުއްޓާލުމަށާއި ހަމާސްއިންނާއި އިސްރާއިލުން ރަހީނުކޮށްފައިވާ މީހުން މިނިވަން ކުރަން ދެފަރާތުން އެއްބަސްވެ އެކަން އިއުލާނުކޮށްފައި ވަނީ ރޭގެ ވަގުތެއްގައެވެ.

އިސްރާއީލުން މިކަމަށް އެއްބަސްވެފައިވަނީ އެމެރިކާ، މިސްރު އަދި ގަތަރު މެދުވެރިއަކަށް ވެގެން އިސްރާއީލާއި ހަމާސް ޖަމާއަތުން ނުސީދާ ގޮތެއްގައި ގަތަރުގެ ވެރިރަށް ދައުހާގައި ކުރިޔަށްދިޔަ ވާހަކަތަކުގައެވެ.

އޮކްޓޯބަރ 7، 2023 އިން ފެށިގެން އިސްރާއީލުން ޣައްޒާގައި ހިންގަމުންދާ ގަތުލްއާއްމުގައި މަދުވެގެން 46،707 ފަލަސްތީނުގެ މީހުން ޝަހީދުވެ، 110،265 މީހުން ޒަޚަމްވެފައިވެއެވެ.