ދިވެހި ދަރިވަރުންނަށް ޖާގަ ދިނުމުގެ ވިސްނުމަށް ޓާރްޓޫ ޔުނިވަރސިޓީއިން މަރުހަބާ ކިޔައިފިއެވެ.
އެ ޔުނިވާސިޓީން މިކަމަށް މަރުހަބާ ކިޔާފައިވަނީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މިހާރު އެސްޓޯނިއާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން އެ ޤައުމުގެ ޓާރްޓޫ ސިޓީގައި ހުންނަ، ޔުނިވަރސިޓީ އޮފް ޓާރްޓޫއަށް ޒިޔާރަތްކުރައްވާ، އެ ޔުނިވަރސިޓީގެ ރެކްޓަރ، ޕްރޮފެސަރ ޓޫމަސް އައްސެރްއާއި އެ ޔުނިވަރސިޓީގެ އޮފިޝަލުންނާއި އެކު ބޭއްވި ބައްދަލުވުމުގެ ތެރެއިންނެވެ.
ޓާރްޓޫ ސިޓީގެ މޭޔަރ، މިސްޓަރ އަރްމަސް ކްލާސް ވެސް ބައިވެރިވެވަޑައިގެން މި ބައްދަލުވުމުގައި ޔުނިވަރސިޓީ އޮފް ޓާރްޓޫގެ އޮފިޝަލުން ވަނީ ސައިންޓިފިކް ރިސަރޗްގެ ރޮނގުން މުޅި ވިލާތު ބައްރުގައިވެސް އެންމެ ކުރިއަރާފައިވާ އެއް ޔުނިވަރސިޓީގެ ގޮތުގައި އެ ޔުނިވަރސިޓީގެ ދަރަޖަ ފާހަގަކުރައްވައި، އެ މުއައްސަސާގެ ވަނަވަރު ތަފްޞީލުކޮށް ދެއްވައި، ތިމާވެއްޓާ ރައްޓެހި ސްމާޓް ސިޓީ ސޮލިއުޝަންތައް ހާސިލުކުރުމުގައި ޓާރްޓޫ ސިޓީއިން ކުރި ދަތުރުގެ މައުލޫމާތު ރައީސް ޑރ.މުޢިއްޒާއި ހިއްސާކުރައްވާ، މަޝްވަރާ ކުރައްވާފައެވެ.
މި ބައްދަލުކުރެއްވުމުގައި ވާހަަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، އެ ޔުނިވަރސިޓީއަށް ޒިޔާރަތްކުރެއްވުމުގެ ފުރުޞަތު ލިބިވަޑައިގަތުމުން ވަރަށް އުފާކުރައްވާ ކަމަށާއި، ޖިޓަލް އީޖާދުތަކާއެކު ރާއްޖޭގެ ސިޓީތަކަށް އެހީތެރިކަން ފޯރުކޮށްދިނުމާއި ޑިޖިޓަލައިޒޭޝަން އަދި ޕޭޕަރލެސް ގަވަރނަންސްގެ ރޮނގުން، ޓާރްޓޫގެ ތަޖުރިބާގެ ބޭނުން ހިއްޕެވުމަށް އެސްޓޯނިއާއާ ގުޅިގެން މަސައްކަތް ކުރެއްވުމުގެ ޝައުގުވެރިވެވަޑައިގަންނަވާކަމަށެވެ.
ދިވެހި ދަރިވަރުންނަކީވެސް ޓާރްޓޫގައި ކިޔެވުމުގެ ފުރުޞަތު އޮތް ބައެއްކަމާއި، މެޑިސިން، ޑިޖިޓަލް ދާއިރާއާއި، މޫސުމަށް އަންނަ ބަދަލުތަކާއި ތިމާވެށީގެ ސައިންސް ފަދަ އެކި ދާއިރާތަކުންވެސް ފަންނުވެރިން ތަމްރީނުކުރަން ޖެހިފައިވާކަން، ފާހަގަކުރައްވާ ރައީސް ޑރ.މުޢިއްޒު ވަނީ ދިވެހި ދަރިވަރުންނަށް މަތީ ތަޢުލީމު ޙާޞިލްކުރުމަށް ހުރި ސްކޮލަރޝިޕް ފުރުޞަތުތަކާއި މަގުތައް އޮޅުންފިލުއްވާފައެވެ.
މިއާއިއެކު، އެ ޔުނިވަރސިޓީގެ މަންދޫބުން ވަނީ އެ ޔުނިވަރސިޓީއިން ދިވެހި ދަރިވަރުންނަށް ޖާގަ ދިނުމުގެ ވިސްނުމަށް މަރުޙަބާ ދަންނަވާ، ލިބެންހުރި ސްކޮލަރޝިޕް ފުރުޞަތުތަކާއި، ދެ ފަރާތުން ގުޅިގެން ކުރެވިދާނެ ކަންކަމުގެ މަޢުލޫމާތު ހުށަހަޅުއްވާފައެވެ. އަދި ޢިލްމީ ރޮނގުން ގުޅުން ބަދަހިކުރުމަށް އިތުރަށް މަޝްވަރާކުރުމަށް، ޔުނިވަރސިޓީ އޮފް ޓާރްޓޫ އޮތީ ތައްޔާރަށް ކަމަށް ވެސް މަންދޫބުން ވަނީ ވިދާޅުވެފައެވެ.
ޓާރްޓޫ ޔުނިވަރސިޓީގެ އޮފިޝަލުން ދެއްވި މެހެމާންދާރީ ފާހަގަކުރައްވާ، ކުރިއަށް އޮތްތާނގައި ގުޅުން ބަދަހި ކުރެއްވުމުގެ ޝައުޤުވެރިކަން ފާޅުކުރައްވަމުން ރައީސް ޑރ.މުޢިއްޒު ވަނީ ދެ ޤައުމުގެ ގުޅުން އިތުރަށް ބަދަހިކުރުމުގެ މުހިންމުކަންވެސް ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
