ރަޝިއާ އާއި ޔޫކްރެއިނުން ކުރަމުންދާ ހަނގުރާމާގައި ދިވެހިރާއްޖެއިން ޔުކްރެއިނަށް ބަޔަތުފިފައިގެން އުޅޭކަމަށް ދެކެވެމުންދާ ވާހަކަތައް ހާރިޖީ ވަޒީރު ޑރ.ޢަބްދުﷲ ހަލީލް ދޮގުކުރައްވައިފިއެވެ.

ރައީސް ޑރ.މުުއިއްޒު މިހާރު އެސްޓޯނިއާއަށް ކުރައްވަމުން ގެންދަވާ ދަތުރުފުޅުގައި މިއަދު ވަނީ އެޤައުމުގެ ޤާނޫނުހަދާ މަޖިލީހަށް ވަޑައިގެން އެތަނުގެ އިސްވެރިންނާއެކު ބައްދަލުކުރައްވާފައެވެ. އެ ބައްދަލުވުންތަކަށްފަހު އެތަނުން އެކްސްގައި ކުރި ޕޯސްޓެއްގައިވަނީ ބައިނަލްއަޤްވާމީ ޤާނޫނުތައް ދިފާއުކޮށް ރާއްޖެއިން ޔުކްރެއިނަށް ތާއީދުކުރާނީ އެކަމަށް ޝުކުރުއަދާކޮށްފައެވެ.

މިކަމާ ގުޅިގެން ހާރިޖީ ވަޒީރު އެކްސްގައި ކުރެއްވި ޕޯސްޓްގައި ވަނީ ރާއްޖެއިން ޔުކްރެއިނަށް ތާއީދުކުރާކަމަށް ބުނާވާހަކަތައް ދޮގުކުރައްވާފައެވެ. ހާރިޖީ ވަޒީރު ވިދާޅުވީ، ބައިނަލްއަޤްވާމީ މައިދާނުގައި ރާއްޖެއިން ގެންގުޅޭ ސިޔާސަތުތައް އަދި ބަދަލުނުވާކަމަށާއި އ.ދ. ގައި ރާއްޖެއިން ވޯޓު ދެމުންދާގޮތް ބައްލަވާލެއްވުމުން އެކަން ސާފުވާނެކަމަށެވެ.

ވަޒީރު ވިދާޅުވީ ކުދި ޤައުމުތަކުގެ މިނިވަންކަމާއި ސިޔާދަތާއި އިސްތިޤްލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ ޕްރިންސިޕަލް ސްޓޭންޑެއް ކަމަށެވެ. ދިވެހިރާއްޖޭގެ ޚާރިޖީ ސިޔާސަތު ބިނާވެގެންވަނީ އެއްވެސް ޤައުމަކާ ހަތުރުވެރި ނުވެ ދިވެހި ރައްޔިތުންނަށް ލާބައާއި މަންފާ ލިބޭ ގޮތަށް އަދި ރާއްޖޭގެ މިނިވަންކަމާ ސިޔާދަތަށް ބުރޫ ނާރާގޮތަށް ހުރިހާ ޤައުމަކާއެކީވެސް ގާތް ގުޅުން ބޭއްވުމުގު މައްޗަށްކަމަށްވެސް ވަޒީރު ފާހަގަކުރެއްވިއެވެ.

ރަޝިއާ ޔޫކްރެއިން ހަނގުރާމައިގައި އެސްޓޯނިއާއިން ތާއީދުކުރަނީ ޔުކްރެއިނަށެވެ. މި ހަނގުރާމައިގައި ޔުކްރެއިނަށް ވާގިވެރިވުމުގެ ގޮތުން އެޤައުމުން ދަނީ އަސްކަރީ އެހީގެ އިތުރުން މާލީގޮތުންވެސް އެހީތެރިކަން ފޯރުކޮށްދެމުންނެވެ.

ޔުކްރެއިނާ ރަޝިއާ އާ ދެޤައުމަށް ބަލާއިރު، ރަޝިއާއަކީ ރާއްޖޭގެ ފަތުރުވެރިކަމުގެ ސިނާއަތުގައި ޒަމާނުއްސުރެ ވަރަށް މުހިއްމު މާކެޓެކެވެ. މިދިޔަ އަހަރު އެކަނިވެސް ރަޝިއާއިން ރާއްޖެއަށް  224,699 ފަތުރުވެރިން ޒިޔާރަތްކުރިއެވެ. ރަޝިއާއަކީ ރާއްޖެއަށް 

ދެވަނައަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ ޤައުމެވެ. އަދި ރާއްޖެއަށް ޒިޔާރަތްކުރާ ފަތުރުވެރިންގެ ތެރެއިން އެންމެބޮޑު ހޭދައެއްކުރަނީވެސް ރަޝިއާގެ ފަތުރުވެރިންކަމަށް ޓޫރިޒަމް ސިނާއަތުގައި ހަރަކާތްތެރިވާ ފަރާތްތަކުން ފާހަގަކުރެއެވެ.