ބޮލީވުޑްގެ މަޝްހޫރު އެކްޓަރު ސައިފް އަލީ ހާން ދިރިއުޅެމުން އަންނަ ގެއަށް ވައްކަންކުރަން ވަތްމީހަކު ވަނީ ރޭ މެންދަމުގެ ވަގުތެއްގައި ސައިފަށް ވަޅިން ހަމަލާދީ އޭނާ ވަރަށްބޮޑަށް ޒަހަމްކޮށްލާފައެވެ. ވަގުކަލޭގެ ވަނީ ސައިފްގެ ގައިގެ 6 ތަނަކަށް ވަޅިހަރާފައެވެ. އޭގެ ތެރެއިން ދެ ތަނެއް ވަރަށް ފުންކޮށް ވަނީ ކަފައިގެން ގޮސްފައެވެ. ވަޅީގެ ހަމަލާ ސައިފްގެ ކަރަށްވެސް ވަނީ އަމާޒުވެފައެވެ.

މި ހަމަލާގެ ތަފްސީލް ހާމަކުރަމުން ވިއޯން ނޫހުން ބުނީ، ވަގުކަލޭގެ ސައިފަށް ހަމަލާދިނުމަށްފަހު ފިލައިގެން ގޮސްފައިވާކަމަށެވެ. ހަމަލާއަށްފަހު ސައިފް ހޮސްޕިޓަލަށް ގެންދިޔައީ އޭނާގެ ދަރިފުޅު އިބްރާހީމް އަލީ ހާން ކަމަށާއި ހޮސްޕިޓަލަށް ގެންދިޔައީ މަގުމަތިންދިޔަ ކުރޮޅިއެއް ހުއްޓުވައިގެންކަމަށް އެނޫހުން ބުންޏެވެ. އެވަގުތު ކުރޮޅިއެއްގައި ހޮސްޕިޓަލަށް ދާންޖެހުނީ ވަގުތުގެ ގޮތުން ޑްރައިވަރު އެގަޑީގައި ގޭގައި ނެތުމުންނެވެ. ސައިފް ގެންދިޔައީ މުމްބާއީގެ ލީލާވަތީ ހޮސްޕިޓަލަށެވެ. އެ ހޮސްޕިޓަލް ހުންނަނީ ސައިފް އާއި އޭނާގެ އަންހެނުން ކަރީނާ ކަޕޫރު އަދި ދަރިން ދިރިއުޅެމުން އަންނަ އިމާރާތާ ގާތްގަނޑަކަށް 2-3 ކިލޯމީޓަރު ދުރުގައެވެ. 

ސައިފަށްދިން ވަޅީގެ ހަމަލާއަށްފަހު މިއަދު އޮޕަރޭޝަންކޮށް ނިމިފައިވާއިރު، ސައިފްގެ އާއިލާއިން ނެރުނު ބަޔާނުގައި ބުނެފައިވަނީ އޮޕަރޭޝަން ކާމިޔާބުކަމަށެވެ. އޮޕަރޭޝަނަށްފަހު ސައިފް މިހާރު އޮތީ އައިސީޔޫގައެވެ. އަދި ބަލަންޖެހޭ ކަންކަން ބަލައި ހާލަތު ރަނގަޅުނަމަ ގެއަށް ދޫކޮށްލާނޭކަމަށް ޑޮކްޓަރުން ބުނެފައިވާަކަމަށް އާއިލާއިން ނެރުނު ބަޔާނުގައި ބުންޏެވެ.

ސައިފް ދިރިއުޅެމުން އަންނަނީ މުމްބާއީގެ ބެންޑްރާ ސަރަހައްދުގައި ހުންނަ ފްލެޓެއްގެ 11 ވަނަ ފަންގިފިލާގައެވެ. މީޑިއާއަށް މައުލޫމާތު ހިއްސާކުރި ސައިފްގެ އަވައްޓެރިއެއް ބުނީ ވަގުކަލޭގެ އެ އެޕާޓްމަންޓަށް ވަދެފައިވަނީ އޭސީޔުނިޓްތައް ބަހައްޓާފައިހުރިތަނުން އަރައިގެންކަމަށް ބެލެވޭކަމަށެވެ. އެތަން ހުންނަނީ ފަސޭހައިން އަރައިގެން އެޕާޓްމަންޓްތަކަށް ވަދެވޭގޮތަށްކަމަށް އޭނާ ބުންޏެވެ. 

މުމްބާއީގެ ފުލުހުން މިހާރުދަނީ މި މައްސަލައިގެ ތަހުގީގުކުރަމުންނެވެ. ނަމަވެސް ސައިފަށް ހަމަލާދިން ވަގުކަލޭގެ އަދި ދެނެގަނެވިފައި ނުވާކަމަށް މައުލޫމާތު ލިބެއެވެ. އަދި ސައިފް ދިރިއުޅެމުން އަންނަ އެޕާޓްމަންޓުން އެއްޗެއް އެއްޗެއް ގެންދިޔަކަމެއް ނޭނގެއެވެ.