ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެސްޓޯނިއާއަށް ކުރެއްވި ރަސްމީ ދަތުރުފުޅު ނިންމަވައިލައްވައިފިއެވެ.

މިއީ ދިވެހިރާއްޖޭގެ ރައީސަކު އެސްޓޯނިއާއަށް ކުރައްވި ފުރަތަމަ ދަތުރުފުޅެވެ. މި ދަތުރުފުޅަކީ އެސްޓޯނިއާގެ ރައީސް އެކްސެލެންސީ ޑރ. އަލާ ކާރިސްގެ ދަޢުވަތަކަށް ކުރެއްވި ދަތުރުފުޅެކެވެ.

މި ދަތުރުފުޅުގައި ރައީސް މުޢިއްޒު ވަނީ އެސްޓޯނިއާގެ އިސް ވެރިންނާ ބައްދަލުކުރައްވައި މަޝްވަރާތައް ކުރައްވާފައެވެ. މީގެ ތެރޭގައި އެސްޓޯނިއާގެ ރައީސް، ޕާލަމެންޓުގެ ރައީސް، ވަޒީރުން، ޓާޓޫ ސިޓީގެ މޭޔަރު އަދި އެކަޑަމިކް ދާއިރާގެ އިސް ބޭފުޅުން ހިމެނެއެވެ. މި ބައްދަލުވުންތަކުގައި ދެ ޤައުމުގެ ދެމެދުގައި އެއްބާރުލުން އިތުރުކުރުމުގެ މަގުތައް ހޯއްދެވުމަށް މަޝްވަރާކުރެއްވިއެވެ.

ރައީސް މުޢިއްޒު އެމަނިކުފާނުގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވެފައިވަނީ މި ދަތުރުފުޅަކީ ދެ ޤައުމުގެ ދެމެދުގައި އާ ބާބެއް ފެށިގެންދިޔަ ދަތުރުފުޅެއް ކަމަށެވެ.

އަދި މި ދަތުރުފުޅުގައި ޑިޖިޓަލައިޒޭޝަން، ތިމާވެށި އަދި ސިޔާސީ މަޝްވަރާގެ ދާއިރާތަކުން އެއްބަސްވުންތަކެއްގައި ސޮއިކުރެވުނު ކަމަށް ވިދާޅުވިއެވެ.

އެސްޓޯނިއާގެ ޑިޖިޓަލް ޓްރާންސްފޮމޭޝަނަކީ ދުނިޔޭގެ ފެންވަރުގައި ނަމޫނާއެއް ކަމަށް ފާހަގަކުރައްވައި، އެކަމުން ދަސްކުރެއްވުމުގެ ފުރުޞަތު ލިބުނުކަން ފާހަގަކުރެއްވިއެވެ. އަދި ދިވެހިރާއްޖޭގައި ޑިޖިޓަލް ވެރިކަން ހަރުދަނާކުރުމަކީ އެމަނިކުފާނުގެ ސަރުކާރުގައި އިސްކަންދޭ ކަމެއް ކަމުގައިވެސް ވިދާޅުވިއެވެ.

ރައީސް މުޢިއްޒު ވަނީ އެސްޓޯނިއާގެ ސަރުކާރާއި ރައްޔިތުންނަށް، ޚާއްޞަކޮށް ރައީސް ޑރ. ކާރިސްއަށް، އެމަނިކުފާނަށާއި ދިވެހި ވަފުދަށް ދެއްވި ހޫނު މަރުޙަބާއާއި މެހެމާންދާރީއަށް ޝުކުރު އަދާކުރައްވާފައެވެ.