Muslimunge mudhalun haggu noon gothugai beynunkoh ulhey meehunnah naraka huhtteve

”މުސްލިމުންގެ މުދަލުން ޙައްޤުނޫން ގޮތުގައި ބޭނުންކޮށް އުޅޭ މީހުންނަށް، ޤިޔާމަތް ދުވަހުން ނަރަކަ ހުއްޓެވެ“

17 Jan 2025 | 13:30

މުސްލިމުންގެ މުދަލުން ޙައްޤުނޫން ގޮތުގައި ބޭނުންކޮށް އުޅޭ މީހުންނަށް ޤިޔާމަތް ދުވަހުން ނަރަކަ ހުރި ކަމަށް ރަސޫލާ ޞޢވ ގެ ހަދީޘްފުޅުން އެނގޭ ކަމަށް މިއަދުގެ ހުކުރު ޚުތުބާގައި ބުނެފިއެވެ.

ބާތިލް ގޮތުގައި މުދާ ހޭދަކުރުން މައުލޫއަށް މިއަދު އިއްވި ޚުޠުބާގައި ބުނީ މުދަލަކީ اللهُ سُبْحَانَهُ وَتَعَالَى އެކަލާނގެ އަޅުންނަށް ދެއްވާ ބޮޑު ނިޢުމަތެއްކަމަށާއި، އެއީ އެކަލާނގެ އަޅުތަކުން އިމްތިޙާނުކުރެއްވުމަށް ޓަކައި ލައްވައިފައިވާ ސަބަބެއް ކަމަށެވެ. އަދި މުދަލަކީ ބިނާކުރުމަށާއި ފަނާކުރުމަށް ބޭނުންކުރެވިދާނެ ވަސީލަތެއްކަމަށް ބުނެފައިވެއެވެ.

ޚުޠުބާގައި އިސްލާމްދީނުގައި މުދާ ހޯދުމަށާއި މުދާ ހޭދަކުރުމަށް ހަރުދަނާ ނިޒާމެއް ލައްވައިފައިވާކަމަށް ބަޔާންކޮށް، އެހެން މީހުންގެ މުދަލަށް އަރައިގަތުމާއި، މުދަލަށް ޚިޔާނަތްތެރިވުމާއި، މުދާ ފޭރުމާއި، މުދަލުން ވައްކަންކުރުމާއި، ޓެކުމާއި، ރިޝްވަތުނެގުމާއި ރިބާކެއުމާއި ޖުވާކުޅުން ފަދަ ކަންކަމުން މުދާ ހޯދުމަކީ އިސްލާމްދީން މަނާކުރާ ކަންތައްތަކެއް ކަމަށް ބުނެފައިވެއެވެ.

ކައުރަސޫލާ ޞއވ ޙަދީޘްކުރެއްވިއެވެ. (إِنَّ رِجَالًا يَتَخَوَّضُوْنَ فِيْ مَالِ اللَّهِ بِغَيْرِ حَقٍّ، فَلَهُمُ النَّارُ يَوْمَ الْقِيَامَةِ) މާނައީ: "ހަމަކަށަވަރުން ﷲގެ މުދަލުން (އެބަހީ: މުސްލިމުންގެ މުދަލުން) ޙައްޤުނޫން ގޮތުގައި ބޭނުންކޮށް އުޅޭ މީހުންނަށް، ޤިޔާމަތް ދުވަހުން ނަރަކަ ހުއްޓެވެ."

މީގެ އިތުރުން، ދައުލަތުގެ މުދަލާއި ފައިސާ ބަލަހައްޓާ މުވައްޒަފުން އެ ތަކެތީގައި ޖެހުމަކީ ޙަރާމް ކަމެއްކަމަށާއި، އެއީ އަމާނާތަށް ޚިޔާނަތްތެރިވުމާއި މަކަރާއި ޙީލަތް ހެދުން ކަމުގައި ޚުޠުބާގައި ބަޔާންކޮށްފައިވެއެވެ. އަދި މަސައްކަތުގެ ގަޑީގައި ވަގުތު ބޭކާރުކުރުމަކީވެސް ބާޠިލު ގޮތުގައި މުދާ ކެއުމުގެ ތެރޭގައި ހިމެނޭ ކަމެއްކަމަށް ބުނެފައިވެއެވެ.

عَدِيُّ بْنُ عَمِيْرَة رَضِيَ اللهُ عَنْهُ ވިދާޅުވިއެވެ. އެއް ދުވަހަކު ރަސޫލުالله ޞޢވ އަހުރެމެންނާ މުޚާޠަބުކުރައްވައި ޙަދީޘްކުރެއްވިއެވެ. (مَنِ اسْتَعْمَلْنَاهُ مِنْكُمْ عَلَى عَمَلٍ، فَكَتَمَنَا مِخْيَطًا فَمَا فَوْقَهُ، كَانَ غُلُوْلًا يَأْتِيْ بِهِ يَوْمَ الْقِيَامَةِ) މާނައީ: "ތިޔަބައިމީހުންގެ ތެރެއިން ކަމަކަށް ތިމަންކަލޭގެފާނު އިސްކޮށްފި މީހާ، ތިނޯހެއް ނުވަތަ އެއަށް ވުރެ ބޮޑު މިންވަރެއް ވެސް ފޮރުވައިފި ނަމަ، އެ ކަން ވާހުށީ ޚިޔާނާތަކަށެވެ. ޤިޔާމަތް ދުވަހުން އެމީހަކު އެޚިޔާނާތާއިގެން އަންނާނެތެވެ."

ޚުޠުބާގައި ރިޝްވަތު ނެގުމަކީ ދައުލަތުގެ މުދަލަށް ޚިޔާނަތްތެރިވުމުގެ ތެރޭގައި ހިމެނޭ ކަމެއްކަމަށް ބަޔާންކޮށް، ރިޝްވަތަކީ ވަރަށް ނުބައި ބައްޔެއްކަމަށާއި، އެއީ ކަންކަން ފާސިދުކުރާ ވަބާއެއްކަމަށް ވިދާޅުވެފައިވެއެވެ.

ޚުޠުބާ ނިންމަވާލައްވަމުން، ޙަލާލު ގޮތުގައި މުދާ ހޯދައި އެ މުދާ ޙަލާލު ގޮތުގައި ހޭދަކުރާ ބަޔަކު ކަމުގައި ލެއްވުމަށް އެދި ދުޢާ ކުރައްވާފައިވެއެވެ.

ދީން

ހުކުރު ޚުތުބާ