މިސްކިތްތަކުގެ ޙުރުމަތް ކަނޑާ ފަރާތްތަކަށް ދީނީ އެއްބައިވަންތަކަން ޙިމާޔަތްކުރުމުގެ ޤާނޫނާއި ޤަވާޢިދުގެ ދަށުން ފިޔަވަޅު އަޅުއްވާނެ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

މިސްކިތެއްގެ ތެރޭގައި، އަންހެނުންނާއި ފިރިހެނުން ހިމެނޭހެން ބަޔަކު، ކުޅިވަރު ކުޅެ ސަކަރާތްޖަހާ މަންޒަރު ފެންނަ ވީޑިއޯއެއް އިއްޔެއިން ފެށިގެން މީސްމީޑިއާގައި އަންނަނީ ދައުރުވަމުންނެވެ. އެ ވީޑިއޯގައި ބުނެފައިވާ ގޮތުން އެއީ ވިލުފުށީ މިސްކިތެއްގެ ތެރޭގައި ހިނގާފައިވާ ކަމެކެވެ. 

އެކަމާއި ގުޅިގެން ގިނަ ބައެއްގެ ނުރުހުން އަންނަނީ ސަރުކާރަށާއި އެ ރަށު ކައުންސިލަށް އަމާޒުވެފައެވެ. 

Advertisement

އެ މައްސަލާގައި ވަޒީރު ޝަހީމް އެކްސްގައި ކުރެއްވި، ޕޯސްޓެއްގައި ވިދާޅުވީ، މިސްކިތެއް ކަމަށް ބެލެވޭ ތަނެއްގައި މިސްކިތެއްގެ ޤަދަރާއި އިޙުތިރާމާ ނުގުޅޭ ކަންތައްތަކެއް ކުރާތަން ފެންނަ ވީޑިއޯގެ މައްސަލަ ސަމާލުކަމަށް އައިސްފައިވާ ކަމަށެވެ.

އަދި މިއީ ކިހިނެއް ހިގާފައިވާ ކަމެއްތޯ ބެލުމުގެ ކަންކަން މިނިސްޓްރީ އިން ފަށާފައިވާ ކަމަށެވެ.

 ”މިސްކިތްތަކުގެ ޙުރުމަތް ކަނޑާ ފަރާތްތަކަށް ދީނީ އެއްބައިވަންތަކަން ޙިމާޔަތްކުރުމުގެ ޤާނޫނާއި ޤަވާޢިދުގެ ދަށުން ފިޔަވަޅު އަޅާނަން. އިންޝާ الله“