ޕާކިސްތާނުގެ ކުރީގެ ބޮޑުވަޒީރު އިމްރާން ޚާންގެ މައްޗަށް އަނެއްކާވެސް ބޮޑު ހުކުމެއް އިއްވައިފިއެވެ.

ހުކުރު ދުވަހު ޕާކިސްތާނުގެ ކޯޓަކުން އިމްރާން ޚާންގެ މައްޗަށް ކޮރަޕްޝަންގެ މައްސަލަ ސާބިތުވާކަމަށް ނިންމައި، އެކުށަށް ދެވޭ އެންމެ ބޮޑު އަދަބުކަމަށްވާ 14 އަހަރުގެ ޖަލު ހުކުމެއް ވަނީ އިއްވާފައެވެ. މިއީ 2023 ވަނަ އަހަރުގެ އޮގަސްޓުން ފެށިގެން ބަންދުގައި އިންނެވި އިމްރާންގެ މައްޗަށް މިހާތަނަށް އިއްވުނު އެންމެ އަދަބު ބޮޑު ހުކުމެވެ. އިމްރާން ޚާންގެ މައްޗަށް 100 އަށްވުރެ ގިނަ ދައުވާ ކުރިއަށްދެއެވެ.

އިމްރާންގެ ޚާންގެ ޕާޚިސްތާން ތެހެރީކޭ އިންސާފް (ޕީ.ޓީ.އައި) އިން ބުނީ މި ޝަރީޢަތަކީ އިންސާފުން އެއްކިބާވެގެން، ސިޔާސީ ބޭނުމަކަށްޓަކައި ކުރިއަށްދިޔަ ޝަރީއަތެއްކަމަށެވެ. ހުކުމްކުރުމާއެކު އިމްރާން ޚާން ވިދާޅުވީ ޑީލެއް ނަހައްދަވާނެކަމަށާއި، ލުޔުއްވެސް ނުހޯއްދަވާނެ ކަމަށެވެ. ޕީ.ޓީ.އައިގެ ޗެއަރމަން ގޯހާރް އަލީ ޚާން ވިދާޅުވީ އިމްރާން ޚާން ދޫ ނުދެއްވާނެކަމަށެވެ.

މިދިޔަ އަހަރުވެސް 14 އަހަރުގެ ޖަލު ހުކުމަކާއި 10 އަހަރުގެ ޖަލު ހުކުމެއް އިމްރާން ޚާންގެ މައްޗަށް ކުރިއެވެ. އެހެންނަމަވެސް ހުކުމްކުރިތާ ގިނަ ދުވަހެއް ނުވެ އެ ހުކުމްތައް ވަނީ ސަސްޕެންޑްކޮށްފައެވެ.

އިމްރާން ޚާން ބަންދުކޮށް، އިންތިޚާބުތަކުގައި ވާދަކުރުން މަނާކޮށްފައިވީނަމަވެސް، ޕާކިސްތާނުގެ ސިޔާސީ މަސްރަހުގައިވެސް އަދިވެސް އޭނާގެ ނުފޫޒު ގަދައެވެ.