ދިވެހި ސަރފް ލީގްގެ މިއަހަރުގެ ފުރަތަމަ މުބާރާތް ކަލެގަލެކޮޑާ ކެންސަލްކޮށްފިއެވެ.
މިކަމާ ގުޅޭގޮތުން މޯލްޑިވްސް ސަރފިން އެސޯސިއޭޝަނުން ބުނީ ފެބުރުއަރީމަހުގެ 5 ކުން ފެށިގެން 8 ވަނަ ދުވަހު ބޭއްވުމަށް ތާވަލްކުރި ދިވެހި ސަރފް ލީގްގެ ފުރަތަމަ މުބާރާތްކަމަށްވާ، "ކަލެގަލެކޮޑާ ގދ.ގައްދޫ" ކެންސަލްކޮށްފައިވާކަމަށެވެ. މުބާރާތް ކެންސަލް ކުރަންޖެހުނީ، އިވެންޓްގެ ހޯސްޓިން ޕާޓްނަރ، ގދ ގައްދޫ ކައުންސިލް އިދާރާގެ މާލީހާލަތު ހުރިގޮތުން މުބާރާތަށް ކުރިން ދެމުންއައި އެހީތެރިކަން ދިނުމަށް އުޒުރުވެރިވާކަން އަންގާފައިވާތީކަމަށް ސަރފިން އެސޯސިއޭޝަނުން ބުނެއެވެ.
ސަރފިން އެސޯސިއޭޝަނުން ބުނީ ގައްދޫ ކައުންސިލަކީ އެޖަމިއްޔާ އާ ވަރަށް ގާތް ގުޅުމެއް އޮންނަ އަދި ދިވެހި ސަރފްލީގް ވުޖޫދަށް ގެނައުމުގައި މުހިއްމު ބައިވެރިއެއް ކަމަށެވެ. އަދި ހަމައެހެންމެ ވޭތުވެދިޔަ އަހަރުތަކުގައި އޮމާންކަމާއި ކާމިޔާބުކަމާއެކު ކަޅެގަލެކޮޑާ މުބާރާތް ނިންމާލުމުގައި އެންމެބޮޑު ހިއްސާއެއް ވާ ފަރާތަކީ ގައްދޫ ކައުންސިލްކަމަށް އެޖަމިއްޔާއިން ވަނީ ފާހަގަކޮށްފައެވެ.
އެމްއެސްއޭއިްނ ބުނީ އެ ޖަމިއްޔާގެ އުއްމީދަކީ ކައުންސިލްގެ މާލީ ހާލަތު ރަނގަޅުވެ ކުރިއަށްއޮތް އަހަރުގެ ތެރޭގައި ކަލެގަލެކޮޑާ މުބާރާތް ކުލަގަދަ އަދި ފޯރިގަދަ މުބާރާތެއްގެ ގޮތުގައި ބޭއްވިގެން ދިއުންކަމަށެވެ، ކަލެގަލެކޮޑާ މުބާރާތް ކެންސަލްވުމުން ދިވެހި ސަރފް ލީގުގެ ފުރަތަމަ އިވެންޓް ބާއްވާނެ ތަނަކާއި ތާރީހެއް ފަހުން އިއުލާނުކުރާނޭކަމަށް ސަރފިން އެސޯސިއޭޝަނުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
