ކުދިންގެ ކިޔެވުމަށް ބުރޫނާރާނެ ގޮތަށް ސްކޫލުތަކުގެ އިތުރު ހަރަކާތްތައް އިންތިޒާމްކުރުމަށް ތައުލީމާއި ބެހޭ ވަޒީރު، ޑރ.އިސްމާއީލް ޝަފީއު އެދިވަޑައިގެންފިއެވެ.

އިތުރު ހަރަކާތްތައް އިންތިޒާމް ކުރާނެގޮތުގެ މަޝްވަރާ ބައްދަލުވުން ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ވަޒީރު ޝަފީއު ވިދާޅުވީ، ބައެއް ސްކޫލްތަކާއި ރަށްރަށުގައި އިތުރު ހަރަކާތްތައް އިންތިޒާމްކުރަމުން އަންނަގޮތުން އޭގެ ނޭދެވޭ އަސަރު ދަރިވަރުންގެ ކިޔެވުމަށް ކުރަމުން އަންނަކަމަށެވެ.

މިކަމާއި ގުޅިގެން ވަޒީރު ޝަފީއު ވަނީ  ދަރިވަރުންގެ ކިޔެވުމަށް ބުރޫ ނާރާނެފަދަ ގޮތަކަށް އިތުރު ހަރަކާތްތައް ހިންގާ ރޭވޭނެ ގޮތްތަކާއި ގުޅޭގޮތުން މަޝްވަރާކޮށް ރަނގަޅު ހައްލެއް ގެނެވޭނެ ގޮތަކަށް އިންތިޒާމް ކުރުމަށް އެދިވަޑައިގެންފައެވެ.

Advertisement

ކުޅިވަރުގެ ހަރަކާތްތައް ހިންގަންވާނެކަމަށާއި، މިކަންކަން ރާވާއިރު މުޅި ތައުލީމީ ދާއިރާއިން ކުރާ މައިގަނޑު މަސައްކަރަށް ބުރޫއަރައިގެން ނުވާނެކަމަށް ދެކެވަޑައިގަންނަވާކަން ފާހަގަކުރައްވަމުން ވަޒީރު ވަނީ ދަރިވަރުންނާއި ބެހޭގޮތުން ނިންމާ ކޮންމެ ކަމެއްގައި އެންމެ ބޮޑު އިސްކަމެއްދީ ވިސްނަންވާނީ ދަރިވަރުންނަށްކަމަށް ވިދާޅުވެފައެވެ.