ބޭރުފައިސާ ގަނެވިއްކުމުގެ ޤަވާއިދަށް ގެނައި ބަދަލާއެކު ޓޫރިޒަމް ވިޔަފާރިތަކުން މިހާތަނަށް 40 މިލިއަން ޑޮލަރުގެ އަދަދެއް ބޭންކުތަކަށް މާރުކުރާނޭކަމަށް ބެލެވޭކަމަށް މޯލްޑިވްސް މަނިޓަރީ އޮތޯރިޓީން ބުނެފިއެވެ.

އެމްއެމްއޭއިން ބޭރުފައިސާ މާރުކުރުމުގެ ޤަވާއިދަށް ގެނައި އިސްލާހާއެކު މިދިޔަ އަހަރުގެ އޮކްޓޯބަރުމަހު ޓޫރިސްޓް ވިޔަފާރިތަކުން ފަތުރުވެރިން އައި އަދަދަށް ބަލައިގެން ބޭންކަށް ޑޮލަރު މާރުކުރުމުގެ އެންމެ ފަހު ތާރީހެއްގެ ގޮތުގައި ކަނޑައެޅިފައިވަނީ މިމަހުގެ 28 ވަނަ ދުވަހުގެ ނިޔަލަށެވެ. އެމްއެމްއޭއިްނ ބުނީ ރާއްޖޭގައި މިހާރު ހިންގަމުންދާ 175 ރިސޯޓްގެ ތެރެއިން 138 ރިސޯޓަކުން އޮކްޓޯބަރުމަހުގެ ސޭލްސް ރިޕޯޓް ހުށަހަޅާފައިވާކަމަށެވެ. މިހާތަނަށް ސޭލްސް ރިޕޯޓް ހުށަނާޅާ 37 ރިސޯޓެއް އަދި އެބައޮތެވެ.

އެމްއެމްއޭގެ އޮފިޝަލަކު ވޮއިސްއާ ހިއްސާކުރި މައުލޫމާތުގައި ބުނެފައިވަނީ، މިހާރު ހުށަހަޅާފައިވާ ސޭލްސް ރިޕޯޓްތަކުން ދައްކާގޮތުގައި 30 މިލިއަން ޑޮލަރާއި 40 މިލިއަން ޑޮލަރުގެ އަދަދެއް، ރިސޯތްތަކުން ބޭންކުތަކަށް މާރުކުރާނޭކަމަށް ބެލެވޭކަމަށެވެ. ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިދިޔަ އަހަރުގެ އޮކްޓޯބަރުމަހު ރާއްޖެއަށް 172,621 ފަތުރުވެރިން ޒިޔާރަތްކުރިއެވެ. 

ބޭރުފައިސާ މާރުކުރާބެހޭ އައު ޤަވާއިދު މިދިޔަ ޑިސެމްބަރުމަހުގެ 14 ވަނަ ދުވަހު ރައީސުލްޖުމްހޫރިއްޔާ ތަސްދީގުކޮށްފައިވާއިރު، އެ ޤަވާއިދަށް އަމަލުކުރަން ފަށާފައިވަނީ، މިހިނގާ ޖެނުއަރީމަހުގެ އެއްވަނަ ދުވަހުން ފެށިގެންނެވެ. ޤަވާއިދުގައިވާގޮތުން ބޭރުފައިސާގެ އާމްދަނީ ބޭންކަށް ޖަމާކޮށް މާރުކުރުން ލާޒިމްވަނީ، އަހަރެއްގެ މައްޗަށް މަދުވެގެން 15 މިލިއަން ޑޮލަރު އާމްދަނީގެ ގޮތުގައި ލިބޭ ޓޫރިޒަމް ވިޔަފާރިކުންފުނިތަކެވެ.

މި ޤަވާއިދުގައި އޮންނަ ގޮތުން ރިސޯޓްތަކުން، އެ ތަނަށް މަހެއްގެ މައްޗަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު، ނުވަތަ އާމްދަނީގެ 20 އިންސައްތަ ޑޮލަރު މާކުރަން ޖެހެއެވެ. ގެސްޓްހައުސްތަކުން މާރުކުރަންޖެހެނީ ބޮލަކަށް 25 ޑޮލަރު، ނުވަތަ އެފަރާތަކަށް މަހެއްގެ މައްޗަށް ލިބޭ އާމްދަނީގެ 20 އިންސައްތަ ޑޮލަރެވެ.

ރައީސް ޑރ.މުއިއްޒު ވިދާޅުވެފައިވަނީ ޑޮލަރު މާރުކުރުމުގެ އައު ގަވާއިދަށް އަމަލުކުރަން ފެށުމުން ޑޮލަރު ލިބުމުގެ މައްސަލައަށް ހައްލެއް ލިބި، ދައުލަތުގެ ކުންފުނިތަކަށްވެސް އޭގެ މަންފާ އެންމެ ރަނގަޅަށް ކުރަމުންދާނޭކަމަށެވެ.