ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވައުދުފުޅާއި އެއްގޮތަށް ރޯދަމަހަށް ގޭބީސީތަކަށް ހިލޭ ބަހާ މަސްދަޅުތަކުން 40 ގްރާމް މަސް އުނިނުވާނެކަމަށް މިފްކޯއިން ބުނެފިއެވެ.

މިފްކޯއިން މިފަދައިން ބުނީ، މިފްކޯއިން ރޯދަމަހު ގޭބިސީތަކަށް ބަހާ މަސްދަޅުކޭހުގައި ހުންނަ ކޮންމެ މަސްދަޅަކުން 40 ގްރާމް މަސް މަދުކުރާކަމަށް ބުނެ ސޯޝަލް މީޑިއާގައި ފެތުރެމުންދާ ވާހަކަތަކާއި ގުޅިގެން އެކްސްގައި ކުރި ޕޯސްޓެއްގައެވެ.

މި ޕޯސްޓްގައި މިފްކޯއިން ބުނީ، ރައީސް ޑރ.މުޢިއްޒުގެ ވައުދުފުޅާއި އެއްގޮތަށް ރޯދައަށް ގޭބިސީތަކަށް ހިލޭ ބަހާ މަސްދަޅުން 40 ގްރާމް މަސް އުނިނުވާނެކަމަށާއި، ފަތުރަމުންދަނީ ދޮގު ވާހަކަތަކެއްކަމަށެވެ.

Advertisement

މިގޮތުން މިފްކޯއިން ބުނީ، 140 ގްރާމް މަސްދަޅު ބާޒާރަށް ނެރުނީ ކުދި ގޭބިސީތަކަށް ކަމަށާއި، މަސް ދަޅު ފްރިޖު ކުރުމަކީ ރަނގަޅު ކަމަކަށް ނުވާތީ އެއްފަހަރު ބޭނުންކުރެވޭ އެއްޗެއްގެ ގޮތުގައި ބޭނުން ކުރުމަށްކަމަށެވެ.

މީގެ ކުރިން، ކުރިއަށް އޮތް ރަމަޟާން މަހު ކޮންމެ ގޭބީސީއަކަށް ދިނުމަށް ހަމަޖެހިފައިވަނީ 48 ދަޅުގެ މަސްކޭހެއް ކަމަށް މިފްކޯއިން ހާމަކޮށް ބުނީ، ކޮންމެ ރަމަޟާން މަހަކަށް ލައްކައަކާ ގާތްކުރާ އަދަދަކަށް މަސްދަޅު އުފައްދާއިރު، ރައީސް ޑރ.މުޢިއްޒުގެ މިވައުދުފުޅާއިއެކު، އިތުރު މަސްދަޅު އުފެއްދުމުގެ މަސައްކަތް ކުރަމުން އަންނަކަމަށެވެ.

ހަމަމިއާއިއެކު، މިދިޔަ އަހަރެކޭވެސް އެއްފަދައިން މިއަހަރުވެސް ހުރިހާ ގޭބިސީއަކަށް ފެން ބިލާއި ކަރަންޓު ބިލުން ޑިސްކައުންޓް ދެއްވުމަށްވެސް ރައީސް ޑރ.މުޢިއްޒު ނިންމަވާފައިވާކަން ފާހަގަކޮށްލަން ޖެހެއެވެ.