ސަރުކާރު ހިންގާ ޕީއެންސީއަށް އޮޅުވާލައިގެން މީހުން ވައްދާފައިވަނީ ސަރުކާރުގެ ކަމާ ބެހޭ ބައެއް އިދާރާތަކުގެވެސް އެއްބާރުލުމާއެކުގައިކަމަށް އިދިކޮޅު އެންމެބޮޑު ޕާޓީ، އެމްދިޕީގެ ލީގަލް ޓީމުން ތުހުމަތުކޮށްފިއެވެ.

ޕީއެންސީން އޮޅުވާލަިއގެން އެ ޕާޓިއަށް މީހުން ވެއްދި މައްސަލާގައި އެމްޑީޕީގެ ލީގަލްޓީމުން މިއަދު ބޭއްވި ނުސްވެރިންގެ ބައްދަލުވުމުގައި އެޓީމުން ބުނެފައިވަނީ، ވަގަށް ފޯމް ފުރުމުގައި ސަރުކާރުގެ ބައިވެރިވުން އެބައޮތްކަމަށް މިހާތަނަށް ފެންނާންހުރި ހެކިތަކުން އެނގޭކަމަށެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޑީޕީ ލީގަލްޓީމު މެމްބަރު އިބްރާހިމް ޝިޔާމް ވިދާޅުވީ ޕީއެންސީއަށް މެމްބަރުން އިތުރުކުރުމަށް އިލެކްޝަނަސް ހުށަހަޅާފައިވާ ފޯމްތަކުގައި ހިމެނޭ އިނގިލީގެ ނިޝާނާއި ސޮއި ފޯޖްކޮށްފައިވާކަމަށް އެ ފޯމް ހުށަހަޅާފައިވާ ފަރާތުން ބުނަމުންދާކަމަށެވެ. ވަގު ފޯމް މައްސަަލާގައި އެމްޑީޕީގެ ފަރާތުން އެކަނިވެސް 3،000 މެމްބަރުންގެ ޝަކުވާ ހުށަހެޅިފައިވާކަމަށް އޭނާ ވިދާޅުވިއެވެ. އިބްރާހީމް ވިދާޅުވީ ކަން ހިނގާފައިވާ އަދި ހުށަހެޅިފައިވާ ޝަކުވާތަކަށް ބަލާއިރު، މިއީ ޕީއެންސީން އެކަނި ކޮށްފައިވާ ކަމެއްކަމަކަށް ބެލެވެން ނެތްކަށެވެ. މިކަމުގައި ސަރުކާރުގެ ބައިވެރިވުން އެބައޮތް ކަމަށާއި، މިއީ ރޭވިގެން ހިންގާފައިވާ ޖަރީމާއެއްކަމަށް އޭނާ ވިދާޅުވިއެވެ.

އެނާ ވިދާޅުވީ މިކަމުގައި ސަރުކާރުގެ ހިއްސާއެއްވާކަން ފާހަގަކުރެވޭ ކަމަކީ ރައްޔިތުންގެ މަސްލަހަތާ ގުޅިފައިވާ މިފަދަ ބޮޑު ކަމެއްގައި ޝަކުވާތަކެއް އުފެދޭ ކަމަށްވާނަމަ ޕްރޮސެކިއުޓަރ ޖެނެރަލްގެ ފަރާތުން އެފަދަ ކަމެއް ބެލުމަށް އަމަލުކުރައްވާނޭ ކަމަށެވެ. ނަމަވެސް މިކަމުގައި ޕްރޮސެކިއުޓަރގެ ހަބަރެއް އަދި މިހާތަނަށް ނުވާކަމަށް އޭނާ ވިދާޅުވިއެވެ.

ވަގުފޯމް ފުރި މައްސަލާގައި އެމްޑީޕީ ޤާނޫނީ ޓީމުގެ ޑިރެކްޓަރު މަހްފޫޒް ސައީދު ވިދަޅުވީ ސިޔާސީޕާޓީއެއްގެ މެމްބަރެއްގެ ގޮތުގައި ހިމެނުމަކީ ޤާނޫނު އަސާސީން ލިބިދޭ ހައްގެއް ކަމަށާއި، ވަކި ޕާޓީއަކުން ކުރާ ކަމަކުން އެ ހައްޤު ހިފެހެއްޓިގެން ނުވާނޭކަމަށެވެ. އިލެކްޝަން ކޮމިޝަނުން މިހާރު އަންގާފައި ވަނީ މިމަހުގެ 31 ގެ ފަހުން އެއްވެސް ސިޔާސީ ޕާޓިއަކުން ހުށަހަޅާ އެއްވެސް ފޯމެއް ޕްރޮސެސް ނުކުރަން ކަމަށާއި ނަމަވެސް އެކަން އެގޮތަށް ނުކުރެއްވޭނޭކަމަށް މަހްފޫޒް ފާހަގަކުރެއްވިއެވެ. ފެންމަތިވެގެން މިއުޅޭ މައްސަލައަކީ ވަކި ޕާޓިއަކުން ކުރިކަމަކުން އުފެދިގެން އުޅޭ މައްސަލައެއް ކަމަށާއި އެކަމުގައި އަމަލުކުރަންވީގޮތް ވަރަށް ސާފު ކަމަށެވެ.

ޕީއެންސީން ވަގަށް ފޯމްތަކެއް ފުރި މައްސަލަ އެމްޑީޕީން ވަރަށް ސީރިއަސްކޮށް ނަގާފައިވައިރު، އެޕާޓީން ވަނީ މި މައްސަލަ ބަލައިދިނުމަށްއެދި ކަމާބެހޭ އިދާރާތަކަށް ހުށަހަޅާފައެވެ. މީގެ އިތުރުން މި މައްސަލާގައި ދާހިލީ ވަޒީރު އަލީ އިހްސާނުގެ ބައިވެރިވުން އޮތްކަމަށް ބެލެވޭތީ، އެމްޑީޕީގެ މެމްބަރުން ވަނީ މިނިސްޓަރު އިހްރާން ވަކިކުރުމަށް މަޖިލީހަށްވެސް ހުށަހަޅާފައެވެ.

އޮޅުވާލައިގެން ޕީއެންސީއަށް މީހުން ވެއްދުމުގެ މައްސަލަތަކެއް ފެންމަތިވެފައިވާއިރު، ވެއްދި މީހުންގެ ތެރޭގައި އެމްޑީޕީއަށް ނިސްބަތްވެ ވަޑައިގަންނަވާ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ހިމެނެއެވެ.