މާލެ ސަރަހައްދުގެ ވައި ނުރައްކާތެރި މިންވަރަކަށް ނުސާފުވެ، ސަމާލުވާން އެދެފިއެވެ.

މާލެ ސަރަހައްދުގެ ވައިގެ ކޮލިޓީ ދަށްވެ، އެއާ ކޮލިޓީ އިންޑެކްސްއަށް ބަލާއިރު 137 ގައި ކަމަށް އެންވަޔަރަމެންޓް މިނިސްޓްރީއިން ވަނީ ހާމަކޮށްފައެވެ.

މިއާއިއެކު ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ވައި ނުސާފު ވަގުތުތަކުގައި ސަމާލުކަން ދޭންވީ ކަންތައްތައް ހިއްސާކޮށްފައެވެ. އޭގެ ތެރޭގައި ހިމެނެނީ:

1) ފުއްޕާމޭގެ ބަލިތަކާއި ހިތުގެ ބަލި، އެލާޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަ ނުކުރުން.

2) ބޭރަށް ނިކުންނަން ޖެހޭ ހާލަތްތަކުގައި ރައްކާތެރި މާސްކު އެޅުން.

3) ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ބޭރުގައި ގިނަ ވަގުތު ހޭދަ ނުކުރުން.

4) ތުއްތު ކުދިން ބޭރަށް ނުނެރުން.

5) ގޭގެ ދޮރުތައް ލައްޕާފައި ބެހެއްޓުން.

6) ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންތައްތައް މަޑު ޖައްސާލުން

މިވަގުތު މާލެ ސަރަހައްދުގެ ވައިގެ ނުސާފުމިން ހުރި މިންވަރަށް ބަލާއިރު، މިއީ ނާޒުކު ހާލަތުގައިވާ ފަރާތްތަކަށާއި، އެހެންމީހުންނަށް ވެސް ނޭވާލާ ނިޒާމު ބަލިޖެހުން ބޮޑު މިންވަރެއްކަން ފާހަގަކޮށްލަން ޖެހެއެވެ.