އިސްރާއީލުން ޣައްޒާގައި ހިންގަމުންދާ ޤަތުލް ޢާއްމު މެދުކަނޑާލުމަށް ވެވުނު އެއްބަސްވުން ތަންފީޒުކުރާ ގަޑި ލަސްވިކަން ނޭނގި، އެނބުރި ގެއަށް ދިޔަ އާއިލާއެއްގެ ތިން މީހުން އިސްރާއީލުގެ ހަމަލާއަކުން ޝަހީދުވެއްޖެއެވެ.

އިސްރާއީލުގެ ނިރުބަވެރި ބޮޑުވަޒީރު ބެންޖަމިން ނެތަންޔާހޫގެ އެންގުމަށް ޤަތުލް އާއްމު މެދުކަނޑާލުން ތިން ގަޑިއިރަށް ލަސްކުރީ، ހަމާސްއިން ދޫކޮށްލާނެ ތިން އިސްރާއީލު ހައްޔަރީންގެ ނަންތައް ފޮނުވާފައި ނުވާތީ ކަމަށް ބުނެއެވެ. ނަމަވެސް އަލް-ޤިދްރާ އާއިލާއަށް މި މަޢުލޫމާތު ލިބިފައެއް ނުވެއެވެ. 

އަލް-ޤިދްރާ އާއިލާގެ އަޙްމަދު އަލް-ޤިދްރާ އޭނާގެ ހަތް ދަރިންނާއި އަނބިމީހާއާއެކު ޚާން ޔޫނިސްގެ އިރުމަތީ ސަރަޙައްދަށް ދަތުރުކުރަމުން ދަނިކޮށް، އިސްރާއީލުގެ މިސައިލް ހަމަލާއެއް އެމީހުން ދަތުރު ކުރަމުންދިޔަ އުޅަނދަށް އަމާޒުވެ މި ހަމަލާގައި އަޙްމަދާއި އޭނާގެ 16 އަހަރުގެ ދަރިފުޅު ޢަދްލީ އަދި 6 އަހަރުގެ ދަރިފުޅު ސަމާ ވަނީ ޝަހީދުވެފައެވެ.

"އަހަރެމެން މުޅި ޤަތުލް ޢާއްމުގައިވެސް ސާބިތުވެހުރިން. އެންމެ ދަތި ޙާލަތްތަކާ ކުރިމަތިލީމު. އެކަމަކު އެކަން ނިމުމަކަށް އަންނަން ކައިރިވީ ވަގުތު އަހަރެންގެ ދަރިން ގެއްލުނީ.؟" އަހުމަދުގެ އަނބިމިހާ ޙަނާން ބުނެފައިވެއެވެ.

ޙަނާން ބުނި ގޮތުގައި، މި ހާދިސާއިން އޭނާގެ ދިރިއުޅުން ވަނީ ބަދަލުވެގެން ގޮސްފައެވެ.

ހަނާން އޭނާގެ ދެ ދަރިންނާއެކު؛ އޭނާގެ ފިރިމީހާ އާއި ދެ ދަރިން ވަނީ ނިރުބަވެރިންގެ ހަމަލާގައި ޝަހީދު ވެފައި: ފޮޓޯ/ އަލްޖަޒީރާ

"އަހަރެންގެ ދަރިންނަކީ އަހަރެންގެ ދުނިޔެ. އަހަރެންގެ ފިރިމީހާއާއި ދެ ދަރިން ގެއްލުނީ. އަހަރެންނަށް މިހާރު ކުރިއަށް ދެވޭނީ ކިހިނެއް؟" އޭނާ ބުންޏެވެ.

މި ހާދިސާއިން އަލް-ޤިދްރާ އާއިލާގެ ދެން ތިބި ކުދިން ކަމުގައިވާ 12 އަހަރުގެ ޔާސްމިން، 8 އަހަރުގެ އަސީލްއާއި 11 އަހަރުގެ މުޙައްމަދު ވެސް ދިރި ތިބިއިރު، އީމާން ނަމަކަށް ކިޔާ އަނެއް ދަރިފުޅު ޚާން ޔޫނިސްގެ ނާސިރު ހޮސްޕިޓަލުގައި ދަނީ ފަރުވާ ހޯދަމުންނެވެ.

ޙަނާން ވިދާޅުވީ އާއިލާއިން 15 މަސް ދުވަހުގެ ތެރޭގައި އިސްރާއީލުގެ ހަމަލާތަކާ ކުރިމަތިލާންޖެހި، އެތައް ފަހަރަކު ގެދޮރު ދޫކޮށް ދާންޖެހި، ޓެންޓުގައި ދިރިއުޅެންޖެހުނެވެ. އަދި އާއިލާގެ ގިނަ މެންބަރުން އިސްރާއީލުގެ ހަމަލާތަކުގައި ޝަހީދުވެފައިވާ 46,900 އަށްވުރެ ގިނަ ފަލަސްތީނުންގެ ތެރޭގައި ހިމެނެއެވެ.

ޣައްޒާގެ ސިވިލް ޑިފެންސްއިން މައުލޫމާތު ދީފައިވާ ގޮތުގައި ޤަތުލްއާއްމު ހުއްޓުން ތަންފީޒުވުމުގެ ކުރިން ހިނގި ތިން ގަޑިއިރުގެ ތެރޭގައި އިސްރާއީލުގެ ހަމަލާތަކުގައި 19 ފަލަސްތީނު ރައްޔިތުން ޝަހީދުވެފައިވެއެވެ.