ދެކުނު ކޮރެއާގެ ސަސްޕެންޑް ކުރެވިފައިވާ ރައީސް ޔޫން ސުކް-ޔޯލްގެ ބަންދުގެ މުއްދަތު އިތުރުކޮށްފިއެވެ.
މިދިޔަ ހަފްތާގެ ބުދަ ދުވަހު ޔޫން ހައްޔަރުކޮށްފައި ވަނީ މިދިޔަ އަހަރުގެ ޑިސެމްބަރު 3 ވަނަ ދުވަހު އޭނާ ކުއްލި ގޮތަކަށް މާޝަލް ލޯ އިއުލާނު ކުރުމާއި ގުޅިގެންނެވެ.
މިއާއިއެކު، ޔޫން ބަންދުން ދޫކޮށްލައިފިނަމަ، މައްސަލައިގެ ހެކިތައް ނެތިދާނެކަމުގެ ނުރައްކާ އޮތުމުން އެގައުމުގެ ފަނޑިޔާރަކު ވަނީ އިތުރު 20 ދުވަހަށް އެބޭފުޅާ ބަންދުކުރުމަށް ހުކުމްކޮށްފައެވެ.
މި ހުކުމާއިއެކު ޔޫން އަށް ތާއީދުކުރާ ފަރާތްތައް ވަނީ އެގައުމުގެ ކޯޓުގެ ތެރެއަށް ވަދެ، ތަކެއްޗަށް ގެއްލުން ދީފައެވެ.
ޔޫން ހައްޔަރުކޮށްފައިވިނަމަވެސް، އެ ބޭފުޅާ އަންނަނީ ތަހުގީގީ އިދާރާތަކަށް އެއްބާރުލުން ދިނުމަށް ދެކޮޅު ހައްދަވަމުންނެވެ.
ގާނޫނު ހަދާ މަޖިލީހުގެ މެމްބަރުންގެ ވޯޓާއިއެކު މިދިޔަ ޑިސެމްބަރު މަހުގެ 14 ވަނަ ދުވަހުން ފެށިގެން ރައީސްގެ މަގާމުން ޔޫން ސަސްޕެންޑް ކޮށްފައިވާއިރު، އޭނާ މަގާމުން ވަކިކުރެވޭނީ އެގައުމުގެ ދުސްތޫރީ ކޯޓުން މަޖިލީހުގެ މި ނިންމުން ދަމަހައްޓައިފިނަމައެވެ.
ޔޫންގެ ފަހުން އެގައުމުގެ ވަގުތީ ރައީސްކަމާއި ހަވާލުވި ހަން ޑަކް ސޫ ވެސް މަގާމުން ވަކިކޮށްފައިވާއިރު، މިހާރު އެގައުމުގެ ވަގުތީ ރައީސް ކަމާއި، ވަގުތީ ބޮޑު ވަޒީރުކަން ކުރައްވަމުން އަންނަނީ ޗޮއި ސަންގް މޮކް އެވެ.
Advertisement
This content is created and paid for by advertisers and does not involve Voice Journalists
