ފަލަސްޠީންގެ ޖެނިން ސިޓީއަށް އިސްރާއީލުން ދެމުންދާ އަނިޔާވެރި ހަމަލާތަކުގައި 10 މީހުން ޝަހީދުވެއްޖެއެވެ.

އިސްރާއީލު ސިފައިން ވަނީ ޖެނިންގެ މައިގަނޑު މަގުތައް ބުލްޑޯޒަރުކޮށް، 2،000 އާއިލާއަށްވުރެ ގިނަ އާއިލާ ގެތަކުން ނެރެފައެވެ. އަދި ޖެނިން ރެފިއުޖީ ކޭމްޕާއި ޖެނިން ސަރުކާރު ހޮސްޕިޓަލަށް ވާސިލުވާ ހުރިހާ މަގެއް ވަނީ ބަންދުކޮށްފައެވެ. މީގެ އިތުރުން، ޖެނިންގެ ވަށައިގެންވާ ރަށްތަކުން 20 އެއްހާ މީހުން ވަނީ ހައްޔަރުކޮށްފައެވެ.

އިސްރާއީލު ސިފައިންގެ މި އަނިޔާވެރި ޢަމަލުތަކުގެ ސަބަބުން ޖެނިންގެ ރައްޔިތުންނަށް ވަނީ ބޮޑެތި ގެއްލުންތަކެއް ލިބިފައެވެ. ގިނަ ބަޔަކަށް ގެއަށް ދެވޭގޮތް ނުވެ، ހޮސްޕިޓަލުގެ ގޯތިތެރޭގައި ރޭ ހޭދަކުރަން ޖެހިފައިވެއެވެ. އަދި ޑޮކްޓަރުންނާއި، ނަރުހުންނާއި، ބަލިމީހުންނަށްވެސް ވަނީ އަނިޔާވެފައެވެ.

މި ހާލަތުގައި އދ. ގެ ފަލަސްޠީނު ރެފިއުޖީންގެ އޭޖެންސީ (އަންރުވާ) އިން ވަނީ ޖެނިން ކޭމްޕަކީ "ދިރިއުޅެން ކަމުދާވަރު ތަނެއް" ނޫން ކަމަށް ބުނެފައެވެ. އަދި އދ. ގެ ޚާއްޞަ ރެޕޯޓަރ ފްރަންޗެސްކާ އަލްބަނީސް ވަނީ އިސްރާއީލުގެ މި އަމަލުތައް ކުށްވެރިކޮށް، މިއީ "މަރުގެ މެޝިނަރީ" އެއްކަމަށް ސިފަކޮށްފައެވެ.