އިލެކްޝަންސް ކޮމިޝަނުގައި ދަފްތަރުވެފައިވާ ސިޔާސީޕާޓީތަކުގެ މެމްބަރުންގެ ދަފްތަރަށް ޝަކުވާ ހުށަހެޅުމުގެ ފުރުސަތު އިލެކްޝަނުން ހުޅުވާލައިފިއެވެ.

މިކަމާގުޅޭގޮތުން އިލެކްޝަނުން ކުރި އިއުލާނެއްގައި ބުނެފައިވަނީ، މިދިޔަ ޑިސެމްބަރުމަހުގެ 31 ވަނަ ދުވަހުގެ ނިޔަލަށް ކޮމިޝަނުގެ ދަފްތަރަށް އަދާހަމަކުރެވިފައިވާ ސިޔާސީޕާޓީތަކުގެ މެމްބަރުންގެ ދަފްތަރާ ގުޅޭގޮތުން ޝަކުވާ ހުށަހެޅޫމުގެ ފުރުސަތު މިހާރު ހުޅުވާލާފައިވާކަމަށެވެ. އިލެކްޝަނުން ވަނީ ދަފްތަރު ކުރެވިފައިވާ ފަރާތްތަކުގެ ޞައްޙަކަން ކަށަވަރުކުރުމަށްޓަކައި މެންބަރުންގެ މަޢުލޫމާތު ހިމެނޭ ލިސްޓު މިއަދު އާއްމުކޮށްފައެވެ.

ދަފްތަރުގައި ހިމެނޭ މެމްބަރުންގެ ލިސްޓަށް ޝަކުވާ ހުށަހަޅަންޖެހެނީ ޕޯޓަލް މެދުވެރިކޮށެވެ. އިލެކްޝަނުން ބުނީ، ޝަކުވާ ޕޯޓަލް (ppr.elections.gov.mv) މެދުވެރިކޮށް އޮންލައިންކޮށް ހުށަހަޅާއިރު، ޝަކުވާ ހުށަހަޅަން އެދޭ މީހާގެ ދިވެހި ރައްޔިތެއްކަން އަންގައިދޭ، މުއްދަތު ހަމަނުވާ ރަސްމީ ލިޔުމެއްގެ ކޮޕީއެއް ހުށަހަޅަންޖެހޭނޭ ކަމަށެވެ. އަދި މީގެ އިތުރުން އިލެކްޝަންސް ކޮމިޝަނުގެ ޝަކުވާ ޕޯޓަލްގައިވާ ހުރިހާ މައުލޫމާތެއް ފުރިހަމަކޮށް ސާފު ފޮޓޯއެއް ހުށަހަޅަންވެސް ޖެހެއެވެ.

Advertisement

ޝަކުވާ ހުށަހެޅުމުގެ އެންމެ ފަހު ތާރީހަކީ އަންނަ ފެބްރުއަރީމަހުގެ 10 ވަނަ ދުވަހެވެ. އިލެކްޝަނުން ސިޔާސީޕާޓީތަކުގެ މެމްބަރުންގެ ދަފްތަރަށް ޝަކުވާ ހުށަހެޅުމުގެ ފުރުސަތު ހުޅުވާލާފައިމިވަނީ، ވަގު ފޯމްތަކެއް ފުރައިގެން ޕީއެންސީއަށް މީހުން ވެއްދުމުގެ މައްސަލަތަކެއް ފެންމަތިވެފައިވަނިކޮށެވެ. އިދިކޮޅު އެމްޑީޕީން ވަނީ މި މައްސަލަ ކަމާބެހޭ އިދާރާތަކަށް ހުށަހަޅާފައެވެ.