ޔުއެފާ ޗެންޕިއަންސް ލީގު ލީގުބުރުގައި ބުދަ ދުވަހުގެ ރޭ އަމިއްލަ ދަނޑުގައި ކުލަބު ބުރޫޖް އާއި ދެކޮޅަށް ކުޅުނު މެޗު ފަހަތުން އަރައި 3-1 ގެ ނަތީޖާއަކުން މޮޅުވެ މެންޗެސްޓާ ސިޓީ އިން މުބާރާތުގެ ޕްލޭއޮފްގެ ޖާގައެއް ކަށަވަރުކޮށްފިއެވެ.

ޗެންޕިއަންސް ލީގުގައި މެންޗެސްޓާ ސިޓީ އެންމެ ފަހުން ކުޅުނު މެޗުގައި،ޕީއެސްޖީ އަތުން 4-2 ގެ ނަތީޖާއަކުން ބަލިވެފައިވާއިރު، ކުލަބު ބްރޫޖް އެންމެ ފަހުން ކުޅުނު މެޗުގަައި ޔުވެންޓަސް އާއި ވާދަކޮށް 0-0 ގެ ނަތީޖާއަކުން ދެޓީމު ވަނީ އެއްވަރުވެފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެމުގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ބުރޫޖް އިންނެވެ. މިލަނޑު ފުރަތަމަ ހާފުގެ 45 ވަނަ މިނެޓުގައި ކާމިޔާބުކޮށްދިނީ އެޓީމުގެ މިޑްފީލްޑަރު ރަފައެލް އޮންޔެޑިކާ އެވެ.

މެންޗެސްޓާ ސިޓީ އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 53 ވަނަ މިނެޓުގައި ކާމިޔާބުކޮށްދިނީ އެޓީމުގެ ކްރޮއޭޝިއާ މިޑްފީލްޑަރު މަޓެއޯ ކޮވަސިޗް އެވެ. އަދި ސިޓީ އިން މެޗުގެ ލީޑުހޯދި ލަނޑަކީ ފަހުހާފުގެ 62 ވަނަ މިނެޓުގައި ބްރޫޖްގެ ޑިފެންޑަރު ޖޮއެލް އޯރޑޮނޭޒް އަތުން ބައިކޮޅަށް ވަން ލަނޑެކެވެ. އަދި އެޓީމުން ލީޑު ފުޅާކުރި ލަނޑު 77 ވަނަ މިނެޓުގައި ކާމިޔާބުކޮދިނީ ބްރެޒިލްގެ ފޯވާޑް ސަވީނިހޯ އެވެ.

މިނަތީޖާއެކު ލީގުބުރުގައި ކުޅުނު އަށް މެޗުން މެންސްޓާ ސިޓީއަށް ލިބުނު 11 ޕޮއިންޓާއެކު ލަނޑުގެ ތަފާތުން ލީގު ތާވަލުގެ 22 ވަނަ ލިބުނު އިރު، މިމެޗުން ބަލިވި ބްރޫޖްއަށް ވެސް އަށް މެޗުން 11 ޕޮއިންޓް ލިބިފައިވާއިރު، އެޓީމުން ލީގުބުރުގެ ކުޅުން ނިންމާލީ ތާވަލުގެ 24 ވަނައިގައެވެ.

ޗެންޕިއަންސް ލީގުގެ ފޯމެޓަށް މިސީޒަނުން ފެށިގެން ގެނެވުނު ބަދަލާއެކު މި މުބާރާތުގައި ޖުމްލަ 36 ޓީމަކުން ވާދަކުރިއިރު، މުބާރާތް ކުރިއަށް ގެންގޮސްފައި ވަނީ ލީގު އުސޫލުންނެވެ. އެގޮތުން ކޮންމެ ޓީމަކުން ވެސް ޖުމްލަ އަށް މެޗު ކުޅެފައިވާއިރު، ލީގުބުރުގެ ގަދަ އަށް ޓީމަށް މުބާރާތުގެ ރައުންޓް އޮފް 16 ފުރުސަތު ވަނީ ޔަގީން ވެފައެވެ.

މީގެ އިތުރުން ރައުންޑް އޮފް 16 ގެ ބާކީ އަށް ޖާގަ ލިބިގެންދާނީ ލީގުބުރުގެ ނުވަ ވަނައިން ފެށިގެން 24 ވަނައާއި ދެމެދު ކުޅެވޭ ޕްލޭއޮފް މެޗުތަކުން ކުރިހޯދާ އަށް ޓީމަށެވެ