އެމެރިކާގެ ވޮޝިންގްޓަން ޑީސީގައި އިއްޔެ ރޭ ހިނގި ވައިގެ އެކްސިޑެންޓެއްގައި 67 މީހުން މަރުވެއްޖެއެވެ. މިއީ 2001 ވަނަ އަހަރުގެ ފަހުން އެމެރިކާގައި ހިނގި އެންމެ ނުރައްކާތެރި ވައިގެ އެކްސިޑެންޓެވެ.

އެމެރިކަން އެއަރލައިންސްގެ ބޮމްބާޑިއަރ ސީއާރްޖޭ 700 މަތިންދާބޯޓަކާއި އެމެރިކާ އާމީގެ ބްލެކް ހޯކް ހެލިކޮޕްޓަރެއް ޖެހި، މަތިންދާބޯޓު ޕޮޓޯމެކް ކޯރަށް ވެއްޓުނެވެ. މި ހާދިސާ ހިނގީ މަތިންދާބޯޓު ރޯނަލްޑް ރޭގަން ވޮޝިންގްޓަން ނެޝަނަލް އެއަރޕޯޓަށް ޖައްސަން އުޅެނިކޮށެވެ.

މަތިންދާބޯޓުގައި 60 ފަސިންޖަރުންނާއި 4 ކުރޫ މެމްބަރުން ތިބި ކަމަށް ރޮއިޓާސްއިން ރިޕޯޓް ކޮށްފައިވާއިރު މަރުވި މީހުންގެ ތެރޭގައި ރަޝިއާ، ފިލިޕީންސް އަދި ޖަރުމަނުވިލާތުގެ ރައްޔިތުން ހިމެނެއެވެ. އަދި ކެންސަސް ސްޓޭޓުން ގިނަ ބަޔަކާއި ޒުވާން ސްކޭޓަރުންތަކެއްވެސް މަރުވެފައިވެއެވެ.

މަތިންދާ ބޯޓާއި ހެލިކޮޕްޓަރގައި ތިބި މީހުންނާއި ބެހޭ މައުލޫމާތުތައް އަދި އާއްމު ކޮށްފައި ނުވި ނަމަވެސް، މި ހާދިސާގައި އެއްވެސް މީހެއްގެ ފުރާނަ ސަލާމަތް ނުވާކަމަށް ރިޕޯޓްތައް ބުނެއެވެ.

އެމެރިކާގެ ރައީސް ޑޮނަލްޑް ޓްރަމްޕް ބުނީ މި ހާދިސާ ހިނގަން މެދުވެރިވި ސަބަބުތަކުގެ ތެރޭގައި ފެޑެރަލް ސަރުކާރުގެ ޑައިވަރސިޓީ ޕްރޮގްރާމްތައް ހިމެނިދާނެ ކަމަށެވެ. ނަމަވެސް މިއީ ސިޔާސީ ބޭނުމަށް ދައްކާ ވާހަކައެއް ކަމަށް ބުނެ އިދިކޮޅު ފަރާތްތަކުން ފާޑުކިޔައިފައިވެއެވެ.

މި ހާދިސާ ހިނގަން މެދުވެިރިވި އަސްލު ސަބަބު ނޭނގޭއިރު، އެ ހޯދުމަށް އެމެރިކާގެ ނެޝަނަލް ޓްރާންސްޕޯޓޭޝަން ސޭފްޓީ ބޯޑުން އަންނަނީ މަސައްކަތް ކުރަމުންނެވެ. އެގޮތުން މިހާރު ވަނީ މަތިންދާބޯޓުގެ ކޮކްޕިޓް ވޮއިސް ރެކޯޑަރާއި ފްލައިޓް ޑޭޓާ ރެކޯޑަރ ހޯދާފައެވެ.

ޓްރާންސްޕޯޓޭޝަން ސެކްރެޓަރީ ޝޯން ޑަފީ ބުނީ، ދެ އުޅަނދުވެސް އާންމުކޮށް ދަތުރުކުރާ މަގުތަކުގައި ދުއްވަމުން ދިޔައިރު މުވާސަލާތީ މައްސަލައެއް ދިމާވެފައި ނުވާ ކަމަށެވެ. އަދި އެއަރ ޓްރެފިކް ކޮންޓްރޯލަރުން ހެލިކޮޕްޓަރަށް މަތިންދާބޯޓު އަންނަކަން އަންގައި، މަގު ބަދަލުކުރުމަށް އެންގި ކަމަށް ރޭޑިއޯ މުވާސަލާތްތަކުން ދައްކާ ކަމަށްވެސް ބުންޏެވެ.