ޤަޟާ ޤަދަރަށް އީމާންވުމުގައި ޞަޙާބީ عُبَادَةُ بنُ الصَّامِتِ رَضِيَ اللهُ عَنْهُ އެކަލޭގެފާނުގެ ދަރިކަލުންނަށް ދެއްވި ނަސޭހަތުން ފިލާވަޅު ލިބުގަތުމަށް މިއަދުގެ ޚުތުބާގައި ނަޞޭހަތްތެރިވެއްޖެއެވެ.
ޤަޟާ ޤަދަރަށް އީމާންވުމާއި ގުޅޭ ގޮތުން މިއަދު އިއްވުނު ޚުތުބާގައި ވަނީ، އީމާންކަމުގެ ޙަޤީޤީ ރަހަ ލިބުމަށްޓަކައި، الله މިންވަރުކުރައްވާފައިވާ ކަންކަމަށް އީމާންވުމުގެ މުހިންމުކަން ބަޔާންކޮށްދެއްވައި عُبَادَةُ بنُ الصَّامِتِ رَضِيَ اللهُ عَنْهُ، އެކަލޭގެފާނުގެ ދަރިކަލުންނަށް ދެއްވި ނަސޭަހަތުގެ މައްޗަށް އަލިއަޅުވާލާފައެވެ.
އެކަލޭގެފާނުގެ ދަރިކަލުންނަށް ވިދާޅުވިއެވެ. "އޭ ލޯބިވާ ދަރިފުޅާއެވެ! "ހަމަކަށަވަރުން ތިބާއަށް الله މިންވަރު ކުރައްވައިފައިވާ ކަމެއް ތިބާއަށް ނުޖެހި ނުދާނޭ ކަމަށާއި، އަދި ތިބާއަށް އެކަލާނގެ މިންވަރު ކުރައްވައިފައި ނުވާ ކަމެއް ތިބާއަށް ނުޖެހޭނެކަން ދެނެގެންފުމަށް ދާންދެން އީމާންކަމުގެ ޙަޤީޤީ ރަހަ ތިބާއަކަށް ނުލިބޭނެތެވެ."
މިއާއެކު، އެކަލޭގެފާނުގެ ނަސޭހަތުގައި އެކަލޭގެފާނު، ރަސޫލާ ޞޢވ ގެ ހަދީޘް ބަސްފުޅަކަށް އަލިއަޅުވާލައްވާފައިވާކަން ފާހަގަކޮށް އެ ޙަދީޘްގެ މައްޗަށްވެސް ވަނީ އަލިއަޅުވާލާފައެވެ.
اللهގެ ރަސޫލާ ޞޢވ މިފަދައިން ޙަދީޘްކުރައްވާތީ ތިމަންކަލޭގެފާނު އަޑުއެއްސެވީމެވެ. "ހަމަކަށަވަރުން الله تَعَالَى އެންމެފުރަތަމަ ހެއްދެވީ ޤަލަމެވެ. ފަހެ ޤަލަމަށް އެކަލާނގެ އެންގެވިއެވެ. "ލިޔާށެވެ!" އެހިނދު ޤަލަން ދެންނެވިއެވެ. އަޅުގެ ވެރިރަސްކަލާކޯއެވެ! "ލިޔަންވީ ކޮން އެއްޗެއްތޯއެވެ؟" އެކަލާނގެ އެންގެވިއެވެ. "ޤިޔާމަތާ ޖެހެންދެން ހިނގާނޭ ހުރިހައި ކަމެއް ލިޔާށެވެ!"
އޭ ލޯބިވާ ދަރިފުޅާއެވެ! އަދިވެސް الله ގެ ރަސޫލާ ޞޢވ ޙަދީޘް ކުރައްވާތީ ތިމަންކަލޭގެފާނު އަޑުއެއްސެވީމެވެ. "މި ނޫން ގޮތެއްގެ މަތީގައި މަރުވާ މީހާއީ ތިމަންކަލޭގެފާނު އުޅުއްވި ގޮތުގެ ތެރެއިންވާ މީހެއްނޫނެވެ."
މިއާއެކު ޚުތުބާގައި ބުނީ، عُبَادَةُ بْنُ الصَّامِتِ رَضِيَ اللهُ عَنْهُ އެ ކަލޭގެފާނުގެ ދަރިކަލުންނަށް މި ދަސްކޮށްދެއްވީ އީމާންކަމުގެ ރުކުންތަކުގެ ތެރެއިން ޤަޟާ ޤަދަރަށް އީމާންވުމުގެ މުހިންމުކަމުގެ ވާހަކަ ކަމަށެވެ. އަދި ޤަޟާ ޤަދަރަށް ފުރިހަމައަށް އީމާންނުވާ ނަމަ، އޭނާގެ އީމާންކަން ފުރިހަމަ ނުވާނޭ ވާހަކަ ކަމަށެވެ.
ޚުތުބާގައި ބުނީ، ޤަޟާ ޤަދަރަށް އީމާންވުމަކީ އީމާންކަމުގެ ރުކުންތަކުގެ ތެރެއިން ހަވަނަ ރުކުން ކަމަށާ އީމާންކަމުގެ ރުކުންތަކުގެ ތެރެއިން ރުކުނަކަށް އިންކާރުކޮށްފި މީހާ އީމާންވި ކަމުގައެއް ނުވާނެ ކަމަށެވެ.
އީމާންކަމަކީ ކޮބައިތޯ، ސަލާމްލެއްވި ޖިބްރީލުގެފާނު، ކީރިތި ރަސޫލާ ޞޢވގެ އަރިހުގައި، ސުވާލުދެންނެވުމުން ޙަދީޘްކުރެއްވިއެވެ. (أَنْ تُؤْمِنَ بِاللَّهِ وَمَلَائِكَتِهِ وَكُتُبِهِ وَرُسُلِهِ وَالْيَوْمِ الْآخِرِ، وَتُؤْمِنَ بِالْقَدَرِ خَيْرِهِ وَشَرِّهِ) މާނައީ: "އެއީ، الله އަށާއި، އެކަލާނގެ މަލާއިކަތުންނަށާއި، އެކަލާނގެ (ބާވައިލެއްވި) ފޮތްތަކަށާއި، އެކަލާނގެ ފޮނުއްވި ރަސޫލުންނަށާއި، އާޚިރަތް ދުވަހަށާއި، ހެޔޮ މިންވަރާއި ނުބައި މިންވަރަށް ތިބާ އީމާންވުމެވެ."
މީގެ އިތުރުން ޚުތުބާގައި ވަނީ ޤަޟާ ޤަދަރަށް އީމާންވުމުގައި ހިމެނޭ މައިގަނޑު 4 ކަމެއް ބަޔާންކޮށްފައެވެ. އެއީ؛
1. الله ހުރިހާ ކަމެއް ދެނެވޮޑިގެންވާކަމަށް އީމާންވުން
2. اَللَّوْحُ الْمَحْفُوْظُ ގައި الله ހުރިހާ ކަމެއް ލިޔުއްވާފައިވާކަމަށް އީމާންވުން
3. ހުރިހާ ކަމެއް ހިނގަނީ اللهގެ އިރާދަފުޅުންކަމަށް އީމާންވުން
4. ހުރިހާ އެއްޗެއް ހެއްދެވީ الله ކަމަށް އީމާންވުން
މީގެ އިތުރުން، ޤަޟާ ޤަދަރަށް އީމާންވުމުގެ ސަބަބުން މުއުމިނުންނަށް ލިބޭ ހިތްހަމަޖެހުމާއި، މުޞީބާތްތަކުގައި ކެތްތެރިވުމުގެ މުހިންމުކަން ފާހަގަކުރެވުނެވެ. އަދި الله އަޅުތަކުންނަށް އަނިޔާވެރިނުވާކަމާއި، އެކަލާނގެ ހުރިހާ ކަމެއް ލައްވާފައިވަނީ އަޅުތަކުންގެ މަޞްލަޙަތަށްކަން ބަޔާންކުރެވުނެވެ.
ޚުޠުބާ ނިންމާލެވުނީ، ޤަޟާ ޤަދަރަށް އީމާންވުމާއި ކެތްތެރިކަމަކީ މުސްލިމުންގެ އެންމެ ވަރުގަދަ ހަތިޔާރުކަމަށް ބަޔާންކުރައްވައި، އޭގެ ސަބަބުން ދުނިޔެއާއި އާޚިރަތުގައި ލިބޭނެ ދަރުމައިގެ ވާހަކަ ހަނދާންކޮށްދެއްވައެވެ.
Advertisement
This content is created and paid for by advertisers and does not involve Voice Journalists
