ފޭސްބުކްގައި އޮޅުވާލައިގެން ވިޔަފާރި ކުރާ މާކެޓްޕްލޭސް ސްކޭމްތަކަށް ސަމާލުވުމަށް ފުލުހުންގެ ސައިބަރ ކްރައިމް ސެންޓަރުން އިލްތިމާސްކޮށްފިއެވެ.
މިގޮތުން އެ ސެންޓަރުން ބުނީ ޝައްކު އުފެދޭ ލިސްޓިންގ އަދި ޕޯސްޓްތަކަށް ސަމާލުވެ އެއްޗެއްގެ އަގުހެޔޮ ކަމަށް ފެނުނަސް ނުވަތަ ރަނގަޅު ޑީލެއްހެން ހީވިޔަސް އެ އެއްޗެއް ގަތުމުގެ ކުރިން އިތުރަށް ދިރާސާ ކުރުމަށް އެދޭ ކަމަށެވެ.
ފުލުހުން ބުނީ، އޮޅުވާލައިގެން ހިންގާ ވިޔަފާރި ޕޭޖުތައް ކަށަވަރުކުރުމުގައި ޕޭޖު ހަދާފައި އިން ތާރީޚު ޔަގީންކުރުމާއި، ޕްރޮފައިލްގެ މަޢުލޫމާތު ޙިއްސާކޮށްފައި ހުންނަ މިންވަރާއި އަދި އެޕޭޖުތަކަށް ފޮލޯކޮށްފަ ހުންނަ މީހުންނާއި ފްރެންޑްސް ލިސްޓުގައި ހިމެނޭ މީހުންގެ އަދަދުތަކުންވެސް އެކަން ދެނެގަނެވޭނެކަމަށެވެ.
މިއާއިއެކު ފުލުހުން ވަނީ ޕޭމަންޓް ހެދުމުގައި ވެސް، ޑެލިވަރީ ކުރުމުން ފައިސާ ހަވާލުކުރާ ގޮތްތަކަށް ވިޔަފާރިކުރުން ޚިޔާރު ކުރެވިދާނެކަން ފާހަގަކޮށް ދެ ފަރާތުގެ ރުހުމާއެކު ވިޔަފާރި ފުރިހަމަ ކުރުމަށް އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
