ރެއާލް މެޑްރިޑްގެ ކުރީގެ ކެޕްޓަން އަދި ލެޖެންޑް، ބްރެޒިލްގެ ޑިފެންޑަރު މާސެލޯ އުމުރުން 36 އަހަރުގައި ފުޓްބޯޅަ ކުޅުން ހުއްޓާލިކަން އިއުލާންކޮށްފިއެވެ. 

2007 ވަނަ އަހަރު އުމުރުން 18 އަހަރުގައި ބްރެޒިލްގެ ފްލެމިނެންސް ދޫކޮށް ރެއާލް މެޑްރިޑާއި ގުޅުނު މާސެލޯ ވަނީ އެނާގެ ފުޓްބޯޅަ ކެރިއަރުގައި ކުލަބަށާއި ގައުމީ ޓީމަށް ކުޅުނު 58 މެޗާއެކު ކުލަބަށާއި ގައުމީ ޓީމަށް ޖުމްލަ 656 މެޗު ކުޅެދީފައެވެ 

މާސެލޯގެ ކެރިއަރުގައި އެންމެ ކާމިޔާބު ދުވަސްތައް ހޭދަކޮށްފައި ވަނީ ރެއާލް މެޑްރިޑިގައެވެ. އެގޮތުން އެކުލަބުގައި ހޭދަކުރި 15 އަހަރު ތެރޭގައި މާސެލޯ ވަނީ އެކުލަބާއެކު 25 ތަށި ކާާމިޔާބުކޮށްފައެވެ.

އެގޮތުން ރެއާލް މެޑްރިޑަށް ކުޅުނު 386 މެޗުގައި 26 ލަނޑު ކާމިޔާބުކުރުމުގެ އިތުރުން އޭނާ ވަނީ އެކުލަބާއެކު  ލަލީގާގެ ޗެންޕިއަންކަން ހަ ފަހަރު، ޔުއެފާ ޗެންޕިއަންސް ލީގު ފަސް ފަހަރު، ފީފާ ކުލަބު ވޯލްޑްކަޕް ހަތަރު ފަހަރު، ޔުއެފާ ސްޕަރ ކަޕް ތިން ފަހަރު، ސްޕެނިޝް ސްޕަރ ކަޕް ފަސް ފަހަރު އަދި ކޮޕާ ޑެލްރޭ ދެފަހަރަށް ކާމިޔާބުކޮށްފައެވެ.

ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް ބުނީ "މާސެލޯ އަކީ ރެއާލް މެޑްރިޑާއި ދުނިޔޭގެ ފުޓްބޯޅައިގެ ތާރީހުގައި ވެސް އެންމެ މޮޅު އެއް ލެފްޓް ބެކް ކަމަށެވެ".

"އޭނާ އަކީ އަހަރެމެންގެ އެންމެ މޮޅު އެއް ލެޖެންޑެވެ. އަދި ރެއާލް މެޑްރިޑަކީ އަބަދުވެސް އޭނާގެ ގެ ކަމަށާއި އޭނާއަށް މިކުލަބާއެކު މަސައްކަތް ކުރުމުގެ ފުރުސަތު އަބަދުވެސް އޮންނާނެ ކަމަށެވެ".

2021-22 ވަނަ އަހަރުގެ ސީޒަން ނިމުމުން މެޑްރިޑް ދޫކޮށް ގްރީސްގެ އޮލިމްޕިއާކޯސްއާ ގުޅުނު ނަމަވެސް މާސެލޯ ވަނީ އެކުލަބާއި ގުޅުނުތާ ފަސް މަސް ފަހުން އެޓީމާއެކު ހަދާފައިވާ އެއްބަސްވުން އުވާލާފައެވެ. އަދި 2023 ވަނަ އަހަރު އަލުން އޭނާގެ ކުޑައިރުގެ ކްލަބް ފްލެމިނެންސް އާއި ގުޅުމަށްފަހު ފާއިތުވެދިޔަ ދެ ސީޒަނުގައި އޭނާ ވަނީ އެޓީމަށް 68 މެޗު ކުޅެދީފައެވެ.