ސަޢުދީ އަރަބިއްޔާގައި ފަލަސްޠީނުގެ ދައުލަތެއް ގާއިމުކުރުމަށް އިޒްރޭރޭލުގެ ބޮޑު ވަޒީރު ބެންޖަމިން ނަތަންޔާހޫ ހުށަހަޅައިފިއެވެ. 

ނަތަންޔާހޫ މިހެން ވިދާޅުވީ އެމެރިކާގެ ރައީސް ޑޮނާލްޑް ޓްރަމްޕްއާއި ބައްދަލުކުރުމަށްފަހު އިޒްރޭލުގެ ޗެނެލް 13 އަށް ދިން އިންޓަވިއުއެއްގައެވެ. 

ދަ މިޑްލް އީސްޓް އައި އިން ރިޕޯޓްކުރި ގޮތުގައި ނަތަންޔާހޫ މިފަދައިން ހުށަހަޅާފައިވަނީ އެމެރިކާގެ ރައީސް ޑޮނާލްޑް ޓްރަމްޕް، ޣައްޒާ އެމެރިކާގެ ބަޔަކަށް ހެދުމަަށް ރާވާފައިވަނިކޮށެވެ. އެމެރިކާގެ އިސްތިއުމާރުގެ ދަށަށް ޣައްޒާ ގެނެސް، އެތަނުގައި "ރިވިއެރާ އޮފް ދަ މިޑްލް އީސްޓް" ހަދަން ޓްރަމްޕް ހުށަހަޅާފައި ވެއެވެ. 

ގައްޒާގައި 2023 ވަނަ އަހަރުގެ އޮކްޓޫބަރ މަހުން ފެށިގެން ހަނގުރާމަ ކުރަން އަމުރުކޮށްފައިވާ ނަތަންޔާހޫއާއި ހިލާފަށް ސައުދީ ސަރުކާރުން ވަނީ ފަލަސްޠީނުގައި ވަކި މިނިވަން ދައުލަތެއް ގާއިމުކުރުމަށް ތާއީދުކޮށްފައެވެ. 

ހަނގުރާމައިގައި ޣައްޒާގެ އިންފްރާސްޓްރަކްޗާ މުޅިންހެން ސުންނާފަތިވެފައިވާއިރު ނަތަންޔާހޫ ބުނިގޮތުގައި ސަޢުދީއަކީ ބިމުގެ ޖާގަ ބޮޑު ޤަައުމެއް ކަމުން އެގައުމުގައި ފަލަސްޠީނުގެ ދައުލަތެއް ގާއިމުކުރެވިދާނެއެވެ. 

ނަތަންޔާހޫގެ މި ހުށަހެޅުމަށް ސަޢުދީއެކޭ އެއްފަދައިން އިނގިރޭސި ވިލާތުގެ ލޭބާ ޕާޓީގެ ގިނަ މެންބަރުންވެސް ނުރުހުން ފާޅުކޮށްފައި ވެއެވެ. އަދި އެގައުމުގެ ފޮރިން މިނިސްޓްރީ އިންވެސް ވަނީ ބައިނަލްއަޤްވާމީ ޤާނޫނާއި އދ.ގެ ޤަރާރުތަކާ އެއްގޮތްވާ ގޮތުގެމަތިން، 1967 ވަނަ އަހަރުގެ ކުރިން ކަނޑައެޅިފައި އޮތް ސަރަހައްދީ އިންތަކުގެ މައްޗަށް ބިނާކޮށް، އިރުމަތީ ޤުދުސްއަކީ ފަލަސްޠީނުގެ ވެރިރަށްކަމުގައި ކަނޑައެޅުމަށް ތާއީދުކުރާކަން ހާމަކޮށްފައެވެ.