ޒަޔަނިސްޓު އިސްރާއީލުގެ ޖަލުތަކުގައި ހައްޔަރުކޮށް ލާއިންސާނީ އަނިޔާތައް ދެމުންދާ ފަލަސްޠީނުގެ އެތަކެއް ހާސް ރައްޔިތުންގެ ތެރެއިން 183 މީހުން އިއްޔެ ވަނީ މިނިވަން ކޮށްފައެވެ. 

އެމީހުންނަށް އިސްރާޢީލްގެ ޔަހޫދީން ވަނީ ލާއިންސާނީ އެތައް އަނިޔާއެއް ދީފައެވެ. ފަލަސްޠީނުގެ އިދާރާތަކުން ބުނީ، އޭގެ ތެރެއިން ހަތް މީހެއްގެ ޞިއްޙީ ހާލަތު ދަށްވެ، ފަރުވާ ދިނުމަށް ހަސްފަތާލުގައި އެޑްމިޓު ކުރަން ޖެހިފައިވާ ކަމުގައެވެ.

އިސްރާއީލްގެ ޖަލުގައި އަނިޔާ ލިބުނު ފަލަސްތީނު އަންހެނެއް ކަމުގައިވާ ހަދީލް ޝަތާރާ ބުނި ގޮތުގައި އިސްރާއީލުގެ ޖަލުތަކުގައި ފަލަސްތީނު ރައްޔިތުންނާމެދު ކަންކޮށްފައިވަނީ ”އަނިޔާވެރިކަމާއި ލާއިންސާނީ ކަމުގެ އިންތިހާ ދަރަޖަ“ އަށް ކަމަށެވެ. 

"އެމީހުން ޖަލުތައް ބަދަލުކޮށްލާފައިވަނީ ބޮޑެތި އަނިޔާވެރި އަދި ލާއިންސާނީ ތަންތަނަށް،" ހައިފާގެ ޖަލެއްގައި 7 މަސްދުވަހު ހޭދަކުރި ޝަތާރާ އަލްޖަޒީރާއަށް ބުންޏެވެ.

"އަޅުގަނޑާމެދު ކަން ކުރީ ވަރަށް ލާ އިންސާނީ ކޮށް. އަހަރެންގެ އިތުރުން ދެންވެސް ރަހީނުކުރުމަށްފަހު މިހާރު ދޫކޮށްލާފައިވާ އެހެން ހުރިހާ މުސްލިމުންނާމެދުވެސް ކަން ކުރީ އެފަދައިން. އަންހެން ގައިދީންގެ ގޮތުގައި ތިބި މީހުންގެ ބޮލުގެ އިސްތަށިގަނޑުގައި ގަދަކަމުން ހިފައި ބިންމަތީގައި ދެމި."

އޭނާ އިތުރަށް ބުނި ގޮތުގައި އޭނާއާއި ފަލަސްތީނުގެ ގައިދީންނަށް ކުރިމަތިވި އަނިޔާވެރިކަމުގެ ސަބަބުން އެމީހުންގެ ކުރިމަގާމެދު ޔަޤީންކަމެއް ނެތި ތިބެންޖެހުނެވެ. އެމީހުންގެ އާއިލާތަކާ އަލުން ބައްދަލުވާނެ ކަމުގެ އުއްމީދުވެސް ކެނޑިގެން ދިޔައެވެ. 

ޝަތާރާ ބުނާ ގޮތުގައި އޭނާގެ އުންމީދަކީ ގަތުލުއާއްމު މެދުކަނޑާލާފައި އޮންނަ މުއްދަތު ދެމިގެންދިއުމާއި ޣައްޒާ އަލުން އާރާސްތުކުރުމެވެ.

"އަޅުގަނޑުމެން ބޭނުންވަނީ ޣައްޒާގެ މީހުން އަމާންކަމާއެކު ދިރިއުޅުމަށާއި މުޅި ދުނިޔެ ޣައްޒާއަށް އެހީތެރިވެދިނުމަށް."

އިއްޔެ މިނިވަންކުރެވުނު ފިރިހެނުންގެ ތެރެއިން ހަތް މީހަކު ހޮސްޕިޓަލަށް ގެންދެވުނުއިރު، އެމީހުންނަކީ ހަށިގަނޑު ހިކިފައިވާ އަދި ފެންނަ ގޮތުން ޞިއްޙީ ގޮތުން ޙާލު ދެރަ ބައެކެވެ. އެމީހުންގެ ތެރޭގައި ހަމާސްގެ ފާހަގަކޮށްލެވޭ ސިޔާސީ ޝަޚްޞިއްޔަތެއް ކަމުގައިވާ 61 އަހަރުގެ ޖަމާލް އައް-ޠަވީލް ހިމެނެއެވެ. އޭނާ ބުނި ގޮތުގައި އޭނާ ދޫކޮށްލުމުގެ ކުޑަ އިރުކޮޅެއް ކުރިންވެސް އޭނާ ގައިގައި ތަޅައި އަނިޔާ ކުރިއެވެ. 

މި ފިރިހެނުންނަކީ މަސްތަކެއް ވަންދެން މުޅިން އެކަހެރިކޮށް ބައިތިއްބައި އަނިޔާތަކެއް ތަޙައްމަލުކޮށްފައިވާ ބައެކެވެ.

އެމީހުންނަށް އާއިލާގެ ބޭރުގެ އެއްވެސް ޚަބަރެއް ނުކިބޭ ތަނުގައި ގައިން ތާހިރުވުމުގެ ފުރުޞަތު ވެސް ލިބިފައެއް ނުވެއެވެ. އެތައް ބަޔަކަށް ހަމުގެ ބަލިތައްޖެހި އެކަމުގެ ތަކުލީފު އުފުލަމުންދެއެވެ. މީގެ ތެރޭގައި ފަނިފަކުސާގެ ސަބަބުން ޖެހޭ ހަމުގެ ބަލިތައް ވެސް ހިމެނެއެވެ.

އެމީހުން ދޫކޮށްލުމުގެ ކުރިން، އިސްރާއީލުގެ ޖަލު އޮތޯރިޓީތަކުން އެމީހުންނަށް އިންޒާރުދީ ”ދުޝްމަނުންގެ ފަހަތުން ދުވެ އެމީހުން ހިފާނެ." ކަމަށް ބުންޏެވެ. 

އިންސާނީ ޙައްޤުތަކުގެ ޖަމްޢިއްޔާތަކުން ބުނާ ގޮތުގައި 2023 ވަނަ އަހަރުގެ އޮކްޓޯބަރު މަހުން ފެށިގެން 58 ފަލަސްޠީނު މީހުން އިސްރާއީލުގެ ޖަލުތަކާއި ބަންދު ކޭމްޕުތަކުގައި ޝަހީދު ކޮށްލާފައުވެއެވެ.

އަދި އެމީހުން ލަފާކުރާ ގޮތުގައި ޣައްޒާއިން ”ގެއްލުވާލެވުނު“ އެތައް ބަޔަކުވެސް ވަނީ ޝަހީދުކޮށްލާފައެވެ. ގާތްގަނޑަކަށް 10،000 ފަލަސްޠީނު މީހުން އަދިވެސް އިސްރާއީލުގެ ބަންދުގައި އެބަ ތިއްބެވެ.