ޕޮލިސް ކޯޕަރޭޓިވް ސޮސައިޓީ (ޕޮލްކޯ)ގެ ސާވާއަށް ދިމާވި މައްސަލައިން ޕޮލިސް ފްލެޓާއި ގުޅުންހުރި ގިނަ ލިޔެކިޔުންތައް ފެންނަން ނެތްކަމަށް އޮޑިޓަރ ޖެނެރަލް ހުސައިން ނިޔާޡީ ވިދާޅުވެއްޖެއެވެ.

އޮޑިޓް އޮފީހުން މިކަން ހާމަކުރީ ޕޮލިސް ފްލެޓްތައް އެޅުމުގެ ތެރެއިން ތުހުމަތުކުރެވޭ ކޮރަޕްޝަންގެ މައްސަލައިގައި މިއަދު މަޖިލީހުގެ މާލިއްޔަތު ކޮމިޓީގައި ބޭއްވި ބައްދަލުވުމުގައެވެ. 

މި ބައްދަލުވުމުގައި ވާހަކަދައްކަވަމުން އޮޑިޓަރ ޖެނެރަލް ހުސައިން ނިޔާޒީ ވިދާޅުވި ގޮތުގައި، މި މަޝްރޫޢުގެ ބިޑް އިވެލުއޭޝަނާ ގުޅޭ މަޢުލޫމާތު ހޯދަން އޮޑިޓް އޮފީހުން މަސައްކަތްކޮށްފައި ވެއެވެ. ނަމަވެސް ޕޮލްކޯގެ އައު ވެރިންނާއި ބައްދަލުކުރުމުން އެބޭފުޅުން އަތުގައި ލިޔުން ނެތް ކަމަށް ބުނެފައިވާ ކަމަށް ނިޔާޒީ ވިދާޅުވިއެވެ. މި މައުލޫމާތު ގެޒެޓުގައިވެސް ނެތް ކަމަށް އޭނާ ވިދާޅުވިއެވެ. 

މިކަމާއި ގުޅުންހުރި އޮޑިޓް ރިިޕޯޓް އާންމުކުރި ފަހުން ޕޮލްކޯއިން ބައެއް ލިޔެކިޔުންތައް ހުށަހެޅި ކަމަށް މި ކޮމެޓީގައި އޮޑިޓަރ ޖެނެރަލް ވިދާޅުވިއެވެ.

މިއަދުގެ ކޮމިޓީގައި ވަނީ ޕޮލްކޯ ފްލެޓް މައްސަލައިގައި އެކުލަވާލާފައިވާ އޮޑިޓް ރިޕޯޓް ދިރާސާ ކުރުމަށް ސަބްކޮމިޓީއެއް ހެދުމަށް ފާސްކޮށްފަ އެވެ.

ފުލުހުންނަށް ހާއްސަކޮށްގެން ތަރައްޤީކުރި ފްލެޓްތަކުގެ މައްސަލާގައި އެންޓި ކޮރަޕްޝަން ކޮމިޝަނުން ވަނީ 3 ފެބްރުވަރީގައި ޕޮލްކޯއަށް ވަދެފައެވެ. 

ފުލުހުންނަށް ޚާއްސަކޮށްގެން ހައުސިން ޔުނިޓުތަކެއް އަޅަން ޕޮލްކޯއާ ހަވާލުކުރީ 2013 ވަނަ އަހަރެވެ. ފުލުހުންގެ ފްލެޓްތަކުގެ މައްސަލާގައި އޮޑިޓަރ ޖެނެރަލް ނެރުއްވި ރިޕޯޓްގައިވަނީ، އެ މަޝްރޫޢުއާ ގުޅޭގޮތުން އެތައް މައްސަލަތަކެއް ފާހަގަކޮށްފައެވެ. އެގޮތުން ޕޮލްކޯއާ ހާވަލުކުރުމުން އެ މަޝްރޫއަށް އެއް ބިލިއަނަށް ވުރެ ގިނަ ރުފިޔާ ޚަރަދުވެފައިވާ ކަމަށާ، އެ މަޝްރޫޢު ހިންގާފައިވާ ގޮތުން ދައުލަތަށް 354.7 މިލިއަން ރުފިޔާ ގެއްލުން ވެފައިވާކަމަށް އޮޑިޓަރ ޖެނެރަލް ވަނީ ފާހަގަކުރައްވާފައެވެ.

އޮޑިޓުގައި ބުނީ އެ މަޝްރޫއުއަށް މިހާތަނަށް 1.06 ބިލިއަން ރުފިޔާ ހަރަދުކޮށްފައިވާ ކަމަށާ އެއީ، އަކަފޫޓަކަށް 1،851 ރުފިޔާ ކަމަށެވެ. އެހެން ނަމަވެސް އާންމު ގޮތެއްގައި ކޮންސްޓްރަކްޝަން މަސައްކަތް ކޮށްދޭ އަމިއްލަ ކުންފުނިތަކުން އަކަފޫޓަކަށް 1،300 ރުފިޔާއާއި 1،500 ރުފިޔާއާ ދެމެދުގެ އަގެއްގައި އެ ފަދަ ކޮންސްޓްރަކްޝަން މަސައްކަތް ކޮށްދޭ ކަމަށް ރިޕޯޓްގައިވެއެވެ. އަދި އެ ރޭޓުތަކަށް ބަލާނަމަ، އެ މަޝްރޫއުގެ އަގަށް ޖެހެނީ 745.3 މިލިއަން ރުފިޔާ ކަމަށާ އެންމެ ބޮޑުވެގެން ވެސް 859.9 މިލިއަން ރުފިޔާއަށް އެ މަޝްރޫއު ނިންމާލެވޭނެ ކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ.