އިލެކްޓްރޯނިކް ޗިޕް އުފެއްދުމަށް ބޭނުންވާ އާލާތްތައް އުފައްދާ އެމެރިކާގެ ލޭމް ރިސަރޗުން އިންޑިއާގައި 100 ބިލިއަން ރުޕީޒް (1.2 ބިލިއަން އެމެރިކާ ޑޮލަރު) އިންވެސްޓްކުރާނެކަން އިއުލާނުކޮށްފިއެވެ.

'އިންވެސްޓް ކަރްނާޓަކާ' އިވެންޓެއްގައި އިއްޔެ ލޭމް ރިސަރޗުން އިއުލާންކުރި ގޮތުގައި އެކުންފުނިން ވަނީ ކަރްނާޓަކާ އިންޑަސްޓްރިއަލް އޭރިއާ ޑިވެލޮޕްމަންޓް ބޯޑާއިއެކު އެކަމާ ގުޅޭ އެމް.އޯ.ޔޫގައި މިހާރު ސޮއިކޮށްފައެވެ.

އިންޑިއާއިން ގެންދަނީ އެގައުމުގެ ޗިޕް އިންޑަސްޓްރީ ތަރައްގީކުރުމަށް ގިނަ މަސައްކަތްތަކެއް ކުރަމުންނެވެ. ބޮޑުވަޒީރު ނަރެންދްރަ މޯދީ ވަނީ 2026 ވަނަ އަހަރުގެ ނިޔަލަށް އިންޑިއާގެ ޗިޕް އިންޑަސްޓްރީ 63 ބިލިއަން ޑޮލަރަށް ގެންދިޔުމަށް އަމާޒު ހިފާފައެވެ. އިންޑިއާގެ އަމާޒަކީ ޓައިވާންފަދަ ޗިޕް އިންޑަސްޓްރީގެ ނަގާ ކިޔާ ގައުމަކަށްވުމެވެ.

Advertisement

އިންޑިއާގެ އައިޓީ އިންޑަސްޓްރީގެ މައި މަރުކަޒުކަމަށްވާ ބެންގަލޫރުވެސް ހިމެނެނީ ކަރްނާޓަކާ ސްޓޭޓުގައެވެ.

އެމެރިކާގެ ކެލިފޯނިއާގައި ރަޖިސްޓްރީކޮށްފައިވާ ލޭމް ރިސަރޗްއަކީ ޗިޕް އުފެއްދުމަށް ބޭނުންވާ އެހެނިހެން އާލާތްތައް އުފައްދާ ކުންފުންޏެކެވެ.