މިހާރު ކުރިއަށްދާ "ސީޕީ ކަޕް ހޭންޑްބޯޅަ ޓޯނަމެންޓް 2025" ގެ އަންހެން ޑިވިޝަން ސެމީ ފައިނަލް ފުރަތަމަ މެޗުގައި ސްޕެޝަލް އޮޕަރޭޝަންސް ރެކްރިއޭޝަން ކުލަބު ހާޓް ބީޓް (އެސްއޯއާރުސީ ހާޓް ބީޓް) އާއި މާލޭ ފްރޮންޓްލައިން ޕޮލިސް (އެމްއެފްޕީ) ކުޅުނު މެޗު ވާދަވެރި ކުޅުމަކަށްފަހު 6-7 ގެ ނަތީޖާއަކުން ކާމިޔާބުކޮށް ފައިނަލްގެ ފުރަތަމަ ޖާގަ އެމްއެފްޕީ އިން ކަށަވަރުކޮށްފިއެވެ.

މުބާރާތުގެ ސެމީ ފައިނަލުން އެސްއޯއާރުސީ ހާޓް ބީޓް ޖާގަހޯދީ ގުރޫޕް ކުއާޓާ ފައިނަލްގެ ފުރަތަމަ މެޗުގައި 5-13 ގެ ނަތީޖާއަކުން ޑިޕްލޮމެޓިކް ކްރެޓިކަލް އިންފްރާސްޓްރަކްޗަރ ސެކިއުރެޓީ ޑިޕާޓްމަންޓް ރެކްރިއޭޝަން ކުލަބު (ޑީސީއައިއެސްޑީއާރުސީ) ބަލިކުރުމަށްފަހުއެވެ. އަދި އެމްއެފްޕީ ސެމީ ފައިނަލުން ޖާގަހޯދީ ކުއާޓާ ފައިނަލްގެ ތިންވަނަ މެޗުގައި 16-8 ގެ ނަތީޖާއަކުން ފޮރިންސިކް ފްރެންޑްސް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ދެލަނޑުގެ ލީޑަކާއެކު 4-2 ގެ ނަތީޖާއަކުން އެމްއެފްޕީ ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި އެސްއޯއާރުސީ ހާޓް ބީޓުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން ދެވަނަ ހާފުގައި އެޓީމުން އިތުރު ހަތަރު ލަނޑު ކާމިޔާބުކުރިއިރު، މިހާފުގައި އެމްއެފްޕީއަށް ކާމިޔާބުކުރެވުނީ ތިން ލަނޑެވެ. އަދި މިމެޗުގެ މޮޅު ކުޅުންތެރިއަކީ އެމްއެފްޕީގެ ގޯލުކީޕަރު މަލްހާ އާދަމް އެވެ. އޭނާ ވަނީ މެޗުގައި  އެސްއޯއާރުސީ ހާޓް ބީޓުން ފޮނުވާލި ގިނަ ހަމަލާތަކެއް ދިފާއުކޮށް، މިމެޗުން އެޓީމު މޮޅުވުމުގައި މުހިންމު ދައުރެއް އަދާކޮށްދީފައެވެ.

2 ފެބުރުއަރީ 2025 އިން 13 ފެބުރުއަރީ 2025 ގެ ނިޔަލަށް ކުރިއަށް ގެންދާ މިމުބާރާތުގެ އަންހެން ޑިވިޝަނުގައި މިއަހަރު ޖުމްލަ 12 ޓީމަކުން ވާދަކުރިއިރު، މި ޑިވިޝަންގެ މެޗުތައް ކުރިއަށް ގެންގޮސްފައި ވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދި ދެޓީމުގެ އިތުރުން ތިންވަނަ ހޯދި ޓީމުތަކުގެ ތެރެއިން އެންމެ ރަނގަޅު ނަތީޖާއެއް ހޯދި ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.