އެތްލެޓިކްސް އެސޯސިއޭޝަން އޮފް މޯލްޑިވްސްގެ ފަރާތުން 2025 ވަނަ އަހަރު ބޭއްވުމަށް ތާވަލުކޮށްފައިވާ މުބާރާތްތަކުގެ ކަލަންޑަރު މިއަދު އާންމުކޮށްފިއެވެ.

އެތްލެޓިކްސް އެސޯސިއޭޝަން އޮފް މޯލްޑިވްސްގެ މިއަހަރުގެ ކަލަންޑަރުގައި ޖުމްލަ 11 މުބާރާތެއް ހިމަނާފައިވާއިރު، އޭގެ ތެރޭގައި ދެ ރޯޑްރޭހާއެކު ޖޫނިއަރ ފަސް މުބާރާތާއި ސީނިއަރ ތިން މުބާރާތުގެ އިތުރުން މިއަހަރު މުޅިން އަލަށް ބާއްވާ މާސްޓަރސް އެތްލެޓިކްސް ޗެންޕިއަންޝިޕް ހިމެނެއެވެ.

އެގޮތުން މިއަހަރު ބާއްވާ އެންމެ ފުރަތަމަ މުބާރާތަކީ އެސޯސިއޭޝަން ޗެންޕިއަންޝިޕެވެ. މިމުބާރާތް ބޭއްވުމަށް ހަމަޖެހިފައިވަނީ 23 އެޕްރީލް 2025 އިން 26 އެޕްރީލް 2025 ގެ ނިޔަލަށް މާލޭ ސިޓީ، ކުޅިވަރު އެކުވެނީ ސިންތެޓިކް ޓެރެކުގައެވެ.

މިއަހަރުގެ ދެވަނަ މުބާރާތަކަށް ތާވަލުކުރެވިފައި އޮތީ 1 މެއި 2025 އިން 3 މެއި 2025 ގެ ނިޔަލަށް ބާއްވާ މާސްޓަރސް އެތްލެޓިކް ޗެންޕިއަންޝިޕެވެ. މި މުބާރާތް ބޭއްވުމަށް ހަމަޖެހިފައިވަނީ ހުޅުމާލޭ ސިންތެޓިކް ޓްރެކުގައެވެ. މިއީ މާސްޓަރސް އެތްލެޓިކްސް މޯލްޑިވްސްގެ ފަރާތުން ބާއްވާ މުބާރާތެކެވެ.

މީގެ އިތުރުން 2 މެއި 2025 ވަނަ ދުވަހު "ދިރާގު ފުވައްމުލައް ރަން" ފުވައްމުލަކު ސިޓީގައި ބޭއްވުމަށް ހަމަޖެހިފައިވާއިރު، އަހަރުގެ އެންމެ ބޮޑު އެއް އިވެންޓް ކިޑްސް އެތްލެޓިކް ފިއެސްޓާ ބޭއްވުމަށް ތާވަލުކުރެވިފައި ވަނީ 10 މެއި 2025 ވަނަ ދުވަހު ހުޅުމާލޭ ސިންތެޓިކް ޓްރެކުގައެވެ.

ނެޝަނަލް ޖޫނިއަރ އެތްކެޓިކްސް ޗެންޕިއަންޝިޕް 17 މެއި 2025 އިން 22 މެއި 2025 ގެ ނިޔަލަށް ބޭއްވުމަށް ތާވަލުކުރެވިފައިވާއިރު އަހަރުގެ ފުރަތަމަ ސްކޫލް މުބާރާތް "ލާމު އިންޓަރ ސްކޫލް އެތްކެޓިކްސް ޗެންޕިއަންޝިޕް" ބޭއްވުމަށް ތާވަލުކުރެވިފައިވަނީ 3 ޖޫން 2025 އިން 5 ޖޫން 2025 އަށެވެ.

އެޓޯލް އިންޓަރ ސްކޫލް އެތްލެޓިކްސް މުބާރާތް 21 ޖޫން 2025 އިން 26 ޖޫން 2025 ތާވަލުކޮށްފައިވާއިރު، ނެޝަނަލް އެތްލެޓިކްސް ޗެންޕިއަންޝިޕް ބޭއްވުމަށް ތާވަލުކުރެވިފައިވަނީ 14 އޮގަސްޓް 2025 އިން 16 އޮގަސްޓް 2025 އަށް މާލޭ ސިޓީ، ކުޅިވަރު އެކުވެނީ ސިންތެޓިކް ޓްރެކުގައެވެ. 

މީގެ އިތުރުން މާލޭ އިންޓަރ ސްކޫލް އެތްލެޓިކްސް ޗެމްޕިއަންޝިޕް 4 އޮކްޓޯބަރު 2025 އިން 9 އޮކްޓޯބަރު 2025 ގެ ނިޔަލަށް ހުޅުމާލޭ ސިތެޓިކް ޓްރެކުގައި ބޭއްވުމަށް ތާވަލުކުރެވިފައިވާއިރު،  ދިރާގު މޯލްޑިވްސް ރޯޑް ރޭސް 24 އޮޓޯބަރު 2025 ވަނަ ދުވަހު ހުޅުމާލޭ ސެންޓްރަލް ޕާކުގައި ބޭއްވުމަށް ވަނީ ތާވަލުކުރެވިފައެވެ.

އެތްލެޓިކް ކަލަންޑަރުގައި އަހަރުގެ އެންމެ ފަހު މުބާރާތެއްގެ ގޮތުގައި ތާވަލުކުރެވިފައި ވަނީ 7 ނޮވެންބަރު 2025 އިން 8 މޮވެންބަރު 2025 ގެ ނިޔަލަށް މާލޭ ސިޓީ، ކުޅިވަރު އެކުވެނީ ސިތެޓިކް ޓްރެކުގައި ބޭއްވުމަށް ތާވަލުކުރެވިފައިވާ، ނެޝަނަލް ގްރޭންޑް ޕްރީ އެވެ.