މިހާރު ކުރިއަށްދާ "ސީޕީ ކަޕް ހޭންޑްބޯޅަ ޓޯނަމެންޓް 2025" ގެ އަންހެން ޑިވިޝަން ފައިނަލުގައި މިރޭ ސެންޓްރަލް އިންވެސްޓިގޭޝަން ކޮމާންޑް އިންވެސްޓިގޭޝަން ޔޫނިއަން (ސީއައިސީ އައިޔޫ) އާއި މާލޭ ފުރޮންޓްލައިން ޕޮލިސް (އެމްއެފްޕީ) ކުޅުނު މެޗު ވާދަވެރި ކުޅުމަކަށްފަހު 5-7 ގެ ނަތީޖާއަކުން ކާމިޔާބުކޮށް މުބާރާތުގެ ޗެންޕިއަންކަން ސީއައިސީ އައިޔޫ އިން ހޯދައިފިއެވެ.

މުބާރާތުގެ ފައިނަލުން އެމްއެފްޕީ ޖާގަހޯދީ ސެމީފައިނަލްގެ ފުރަތަމަ މެޗުގައި 7-6 ގެ ނަތީޖާއަކުން ސްޕެޝަލް އޮޕަރޭޝަންސް ރެކްރިއޭޝަން ކުލަބު ހާޓް ބީޓް (އެސްއޯއާރުސީ ހާޓް ބީޓް) ބަލިކުރުމަށްފަހު އެވެ. އަދި ސީއައިސީ އައިޔޫ ފައިނަލުން ޖާގަހޯދީ ސެމީފައިނަލްގެ  ދެވަނަ މެޗުގައި 13-8 ގެ ނަތީޖާއަކުން  ސީޕީ  ގާލްސް ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުނަ ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ތިން ލަނޑުގެ ލީޑަކާއެކު 4-1 ގެ ނަތީޖާއަކުން ސީއައިސީ އައިޔޫ ކުރީގައި އޮވެގެންނެވެ. 

Advertisement

ނަމަވެސް މެޗުގެ ދެވަނަ ހާފުގައި އެމްއެފްޕީ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގައި އެޓީމުން އިތުރު ހަތަރު ލަނޑު ކާމިޔާބުކުރިއިރު، މިހާފުގައި ސީއައިސީ އައިޔޫއަށް ކާމިޔާބު ކުރެވުނީ ތިން ލަނޑެވެ.

އެގޮތުން މިމެޗުގައި ސީއައިސީ އައިޔޫގެ ފާތުމަތު ލިއުޝާ ފަސް ލަނޑު ކާމިޔާބުކުރިއިރު، އެޓީމުގެ ޝަމީގާ މުހައްމަދު އަދި އައިޝަތު ފަލްހާ މޫސާ މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި އެމްއެފްޕީގެ އައިޝަތު މަލިކާ ޝަހީދު ތިން ލަނޑު ކާމިޔާބުކުރިއިރު، އެޓީމުގެ ހަނީފާ އަބްދުލް ހަލީމް އަދި ލަމްޔާ މުހައްމަދު މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ސީއައިސީ އައިޔޫގެ ފާތުމަތު ލިއުޝާ އެވެ.

2 ފެބުރުއަރީ 2025 އިން 13 ފެބުރުއަރީ 2025 ގެ ނިޔަލަށް ކުރިއަށް ގެންދި މިމުބާރާތުގެ އަންހެން ޑިވިޝަނުގައި މިއަހަރު ޖުމްލަ 12 ޓީމަކުން ވާދަކުރިއިރު، މި ޑިވިޝަންގެ މެޗުތައް ކުރިއަށް ގެންގޮސްފައި ވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދި ދެޓީމުގެ އިތުރުން ތިންވަނަ ހޯދި ޓީމުތަކުގެ ތެރެއިން އެންމެ ރަނގަޅު ނަތީޖާއެއް ހޯދި ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.