އެމެރިކާގެ ރައީސް ޑޮނަލްޑް ޓްރަމްޕް, ޣައްޒާ ”ހިފައި" އެތަން އެމެރިކާގެ ބާރުގެ ދަށަށް ގެނައުމަށް ހުށަހަޅާފައިވާ ޕްލޭނާ ދެކޮޅަށް އިއްޔެ ލަންޑަނުގައި އެތައް ހާސް ބަޔަކު އިހްތިޖާޖު ކޮށްފިއެވެ.

ވެސްޓްމިންސްޓަރުގެ ވައިޓްހޯލްއިން ފެށިގެން ސައުތުވެސްޓް ލަންޑަނުގެ ނައިން އެލްމްސްގައި ހުންނަ އެމެރިކާ އެމްބަސީއާ ހަމައަށް ބޭއްވި މި ހިނގާލުމުގައި، މުޒާހަރާގެ ބައިވެރިން ވަނީ ފަލަސްޠީނު ދިދަ ނަގައި، "ހޭންޑްސް އޮފް ޣައްޒާ" އަދި "ސްޓޭންޑް އަޕް ޓު ޓްރަމްޕް" ފަދަ ބެނަރތައް ހިފައިގެން އަޑު އުފުލާފައެޗެ. އަދި "މިސްޓަރ ޓްރަމްޕް، ޣައްޒާއަކީ އެމެރިކާގެ 52 ވަނަ ސްޓޭޓެއް ނޫން" މިފަދަ ބެނަރތަކެއްވެސް ބޭނުންކުރިއެވެ.

"ދެ މިލިއަން މީހުން ނަގައިގެން ގެންދެވޭނެ ގޮތެއް ނެތް. ޚާއްޞަކޮށް ވަށައިގެން ހުރި ޤައުމުތަކުން އެމީހުން ބަލައިނުގަންނާނެކަމަށް ބުނެފައި އޮއްވާ. އެހެންވީމާ މިކަމެއް ނުވާނެ." މުޒާހަރާގެ ބައިވެރިއެއް ބުންޏެވެ.

"ފަލަސްޠީނު ސޮލިޑަރިޓީ ކެމްޕޭން“ (ޕީއެސްސީ) އިން އިންތިޒާމުކުރި މި ހިނގާލުމަކީ، 2023 ވަނަ އަހަރުގެ އޮކްޓޯބަރު 7 ވަނަ ދުވަހުން ފެށިގެން ލަންޑަނުގައި ބޭއްވުނު 24 ވަނަ ބޮޑު ”ޕްރޯ ފަލަސްޠީން“ މުޒާހަރާއެވެ.

މި މަހުގެ ކުރީކޮޅު ޓްރަމްޕް ބުނެފައިވަނީ، އެމެރިކާއިން ޣައްޒާ ހިފައި، އެތަން އަލުން ތަރައްޤީކޮށް "މެޑިޓަރޭނިއަންގެ ރިވިއެރާ" އަކަށް ހަދާނެ ކަމަށެވެ. މި ހުށަހެޅުމަށް ދުނިޔޭގެ އެކި ކަންކޮޅުތަކުން ފާޑުކިޔާފައިވެއެވެ. މި ޕްލޭނުގައި ފަލަސްޠީނުގެ ރައްޔިތުން އެހެން ތަންތަނަށް ބަދަލުކުރުމަށް ހުށަހަޅާފައިވާއިރު، އެމީހުން އަނބުރާ ޣައްޒާއަށް ގެނައުމުގެ އެއްވެސް ވާހަކައެއް ނެތެވެ.