ޕްރެމިއާ ލީގުގެ މެންޗެސްޓާ ޔުނައިޓެޑަށް ކުޅެމުން އަންނަ އައިވަރީކޯސްޓްގެ ހުނަރުވެރި ފޯވާޑް، އަމަދު ޑިއާލޯއަށް އަނިޔާވެ ދިގު މުއްދަތަކަށް ކުޅުމާ ދުރުގައި ހުންނަން ޖެހިއްޖެ އެވެ.

އިނގިރޭސި މީޑިއާ ރިޕޯޓްތައް ބުނާގޮތުން، އުމުރުން 22 އަހަރުގެ ފޯވާޑުގެ ކުޑަހުޅަށް ލިބުނު އަނިޔާއެއްގެ ސަބަބުން މި ސީޒަނުގެ ބާކީ ބައިގައި އޭނާއަށް ކުޅުމުގެ ތެރެއަށް އެނބުރިއައުމުގެ ފުރުސަތު ވަރަށް ކުޑަ އެވެ. 

ރިޕޯޓްތައް ބުނާގޮތުގައި ޑިއާލޯގެ ކުޑަހުޅަށް އަނިޔާވެފައި ވަނީ، ޔުނައިޓެޑްގެ ފަރިތަކުރުންތަކުގެ ތެރެއިންނެވެ. މިއަދު އިންސްޓަގްރާމްގައި ޑިއާލޯ ކުރި ޕޯސްޓެއްގައި ބުނެފައިވަނީ، ސީޒަނުގެ މުހިންމު ހިސާބެއްގައި ލިބުނު އަނިޔާގެ ސަބަބުން ވަރަށް ބޮޑު މާޔޫސްކަމެއް ލިބިފައިވާ ކަމަށާއި އުންމީދަކީ ވީ އެންމެ އަވަހަށް ފިޓްވެގެން އެނބުރި ކުޅުމަށް އައުން ކަމަށެވެ.

ޑިއާލޯ އަކީ މި ސީޒަނުގައި ޔުނައިޓެޑްގެ އެޓޭކުގައި އެންމެ މުހިންމު އެއް ކުޅުންތެރިޔާއެވެ. އޭނާ ވަނީ އެންމެ ފަހުން، ޔުނައިޓެޑުން ކުޅުނު 14 މެޗުގައި އެޓީމަށް ހަ ލަނޑު ކާމިޔާބުކޮށްދީފައެވެ.

އިޓަލީގެ އެޓަލަންޓާ ދޫކޮށް، 2021 ވަނަ އަހަރު ޔުނައިޓެޑާ ގުޅުނު ޑިއާލޯ ވަނީ ދާދި ފަހުން ޔުނައިޓެޑާ އެކު، އޭނާ ހަދާފައިވާ އެއްބަސްވުން 2030 ގެ ޖޫން މަހުގެ ނިޔަލަށް އިތުރުކޮށްފައެވެ.

މިސީޒަނުގައި ދަށް ނަތީޖާތަކެއް ނެރެމުން އަންނަ ޔުނައިޓެޑުން ލީގުގައި މިރޭ ޓޮޓެންހަމް އާއި ދެކޮޅަށް ނުކުންނައިރު، އަނިޔާގެ ސަބަބުން މިމެޗުގައި ޑިއާލޯގެ އިތުރުން މިޑްފީލްޑަރު ކޯބީ މައިނޫ އަށް ވެސް ނުކުޅެވޭނެއެވެ. އަދި މީގެ އިތުރުން އެޓީމުގެ އާޖެންޓީނާ ޑިފެންޑަރު މާޓީނޭޒްގެ، ކަކުލުގެ ލިގަމެންޓަށް ލިބުނު އަނިޔާއަކާ ގުޅިގެން އޮޕަރޭޝަންކޮށްފައިވާއިރު، އޭނާއަށް ވެސް ވަނީ ސީޒަން ނިމިފަ އެވެ.