އެމެރިކާއިން ހިފަހައްޓާފައިވާ ނުރައްކާތެރި އަދި ފަނާކުރަނިވި ހަތިޔާރުތައް ޒަޔަނިސްޓު އިސްރާއީލަށް ގެންދަން ފަށައިފިއެވެ. އެގޮތުން އެމްކޭ-84 މަރުކާގެ ބޮންތައް އިސްރާއީލަށް ގެންދަން ވަނީ ފަށާފައެވެ. 

2024 ވަނަ އަހަރުގެ މޭ މަހުގެ 6 ވަނަ ދުވަހު އިސްރާއީލް ސިފައިން، އައިޑީއެފްއިން ރަފާހަށް އަރައިގަތެވެ. އައިޑީއެފްއިން ރަފާހަށް އަރައިގަތުމާ ގުޅިގެން، އޭރުގެ އެމެރިކާ ރައީސް ޖޯ ބައިޑެން ވަނީ އިސްރާއީލަށް ހަތިޔާރު ފޮނުވުން މުޅިން ހުއްޓާލާނެކަމުގެ އިންޒާރު ދީފައެވެ. އަދި އެމްކޭ-84 މަރުކާގެ 2،000 ޕައުންޑުގެ ބޮންތައް ހިމެނޭގޮތަށް، ބައެއް ހަތިޔާރު ފޮނުވުން ވަގުތީގޮތުން ހުއްޓާލާފައެވެ.

މިއީ އައިޑީއެފްގެ އަރައިގަތުމާމެދު ހިތްހަމަނުޖެހުން ފާޅުކުރުމަށާއި، ގިނަ އަދަދެއްގެ ފަލަސްތީނު އާންމުން މަރުވެއްޖެނަމަ އިތުރު ހަރުކަށި ފިޔަވަޅުތަކެއް އަޅާނެކަމުގެ އިންޒާރެއްގެ ގޮތުން ކުރި ކަމެއް ކަމަށް އޭރު އެމެރިކާއިން ބުންޏެވެ. ނަމަވެސް، އެ ތަކެތި ޔަހޫދީންނަށް ފޯރުކޮށްދިނުން މެދުކަނޑައިލުމަށް ބައިޑަން ނިންމި އަސްލު ސަބަބަކީ، ބައިނަލްއަޤުވާމީ މުޖުތަމަޢުގެ ފާޑުކިޔުންތަކެވެ.

Advertisement

އެހެންނަމަވެސް، މިހާރުގެ އެމެރިކާ ރައީސް ޑޮނަލްޑް ޓްރަމްޕް މަޤާމާ ހަވާލުވުމާއެކު، 2025 ވަނަ އަހަރުގެ ޖަނަވަރީ 20 ވަނަ ދުވަހު، އިސްރާއީލަށް ހަތިޔާރު ފޮނުވުމުގެ މައްޗަށް ޖަހާފައިވާ ފްރީޒް ވަގުތުން ނަގާލިއެވެ. އަދި ޔަހޫދީން ބޭނުންހާ ހަތިޔާރެއް އެ މީހުންނަށް ފޯރުކޮށްދިނުމުގެ ހުއްދަ ދިނެވެ.

އެމެރިކާގެ ދިފާޢީ ވުޒާރާއިން ބުނީ، ޓްރަމްޕްގެ ނިންމުމާއެކު އެކު ހިފަހައްޓާފައިވާ ހަތިޔާރުތައް ދޫކޮށްލުމުން، އެމްކޭ-84 މަރުކާގެ ބޮން އިސްރާއިލަށް ފޯރުކޮށްދިނުމުގެ މަސައްކަތް ފަށާފައިވާ ކަމުގައެވެ.

އަދި، އޭގެ ތެރެއިން ގިނަ އަދަދެއްގެ ހަތިޔާރު މިހާރު ވެސް ޒަޔަނިސްޓު އިސްރާއީލަށް ގެންގޮސްފައިވާ ކަމުގައެވެ. މިކަން އިސްރާއީލުގެ ދިފާޢީ ވުޒާރާއިން ވެސް ވަނީ ކަށަވަރު ކޮށްދީފައެވެ.

އެމްކޭ-84 މަރުކާގެ 900 ކިލޯގެ ބޮމަކީ ވަރަށް ނުރައްކާތެރި އަދި ފަނާކުރަނިވި ހަތިޔާރެކެވެ. އިސްރާއިލުން މީގެ ކުރިން އެ ހަތިޔާރު ބޭނުން ކޮށްފައި ވަނީ، ޣައްޒާގެ ޢާންމު ރައްޔިތުން ދިރިއުޅެމުން ދިޔަ ބޮޑެތި އިމާރާތްތައް ސުންނާފަތިކޮށް ބިމާ ހަމަކޮށްލުމަށެވެ. އެ ފަދަ ހަތިޔާރު ބޭނުންކޮށްގެން ދީފައިވާ ނިރުބަވެރި ޙަމަލާތަކުގައި އެތަކެއް ސަތޭކަ ބައެއް ވަނީ ޝަހީދު ކޮށްލާފައެވެ. ސުންނާފަތި ކޮށްލާފައިވާ އިމާރާތްތަކުގެ ދަށުގައި ޝަހީދު ކޮށްލާފައިވާ އިތުރު 10,000އެއްހާ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އިދާރާތަކުން ޤަބޫލު ކުރެއެވެ.

އިސްރާއިލުން ޣައްޒާގައި ހިންގަމުންދިޔަ ޢުދުވާނުގައި ޝަހީދު ކޮށްލާފައިވާ މީހުންގެ އަދަދު 61,700ށް އުފުލިފައިވާއިރު، ޒަޚަމު ކޮށްލާފައިވާ މީހުންގެ އަދަދު ވަނީ 111,000ށްވުރެ މައްޗަށް އުފުލިފައެވެ. މި ގަތުލު ޢާއްމު މިހާރު މެދުކަނޑައިލާފައި ވަނީ، ޣައްޒާގައި ވެރިކަން ކުރާ ޙަމާސާއި ޔަހޫދީންނާ ދެމެދު ޖަނަވަރީ 19ވަނަ ދުވަހު އަމަލު ކުރަން ފެށި އެއްބަސްވުމުގެ ދަށުންނެވެ.