ޔުއެފާ ޗެންޕިއަންސް ލީގު ޕްލޭއޮފް ދެވަނަ ލެގުގައި ރޭ ކުޅުނު މެޗުތަކަށްފަހު އޭސީ މިލާން މުބާރާތުން ކެޓިއިރު، ބަޔާން މިޔުނިކް މުބާރާތުގެ ގަދަ 16 ގެ ޖާގައެއް ޖެހިޖެހިގެން 17 ފަހަރަށް ހޯދައިފިއެވެ.

މުބާރާތުގެ ގަދަ 16 ގެ ޖާގައެއް ބަޔާން މިއުނިކުން ކަށަވަރުކުރީ ސްކޮޓްލޭންޑްގެ ސެލްޓިކާއި ދެކޮޅަށް އަންގާރަ ދުވަހުގެ ރޭ އަމިއްލަ ދަނޑުގައި ކުޅުނު މެޗުގެ އިތުރު ވަގުތުގެ ތެރޭގައި ކާމިޔާބުކުރި ލަނޑާއެކު 1-1 ގެ ނަތީޖާއަކުން މެޗު އެއްވަރުކޮށް 2-3 ގެ އެގްރިގޭޓް ނަތީޖާއަކުން ކުރިހޯދައިގެންނެވެ.

މިދެޓީމު ސެލްޓިކްގެ ދަނޑުގައި ކުޅުނު މެޗު 1-2 ގެ ނަތީޖާއަކުން ބަޔާން މިޔުނިކް ކާމިޔާބުކުރިއިރު، ރޭގެ މެޗުގައި ފުރަތަމަ ލަނޑުޖަހައި ކުރިހޯދީ ސެލްޓިކް އިންނެވެ. މިލަނޑު ދެވަނަ ހާފުގެ 63 ވަނަ މިނެޓުގައި ކާމިޔާބުކޮށްދިނީ ފޯވާޑް ނިކޮލަސް ގެރިޓް ކޫން އެވެ. އަދި ބަޔާން އިން މެޗުގެ ނަތީޖާ އެއްވަރުކުރި ލަނޑު ފަހުހާހުގެ އިތުރު ވަގުތުތެރޭގައި ކާމިޔާބުކޮށްދިނީ ޑިފެންޑަރު އަލްފަންސޯ ޑޭވިސް އެވެ.

އޭސީ މިލާން އަމިއްލަ ދަނޑުގައި ނެދަލޭންޑްސްގެ ފެނޫޑްއާއި ވާދަކޮށް 1-1 ގެ ނަތީޖާއަކުން އެއްވަރުވިއިރު، މިދެޓީމު ފެނޫޑްގެ ދަނޑުގައި ކުޅުނު މެޗު 1-0 ގެ ނަތީޖާއަކުން ކާމިޔާބުކުރީ ފެނޫޑް އެވެ. މިއާއެކު އެޓީމު މުބާރާތުގެ ގަދަ 16 ގެ ޖާގައެއް ކަށަވަރުކުރީ 2-1 ގެ އެގްރިގޭޓް ނަތީޖާއަކުން ކުރިހޯދައިގެންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަމަ ލަނޑުޖަހައި ކުރިހޯދީ އޭސީ މިލާނުންނެވެ. މިލަނޑު މެޗުގެ ފުރަތަމަ މިނެޓުގައި އެޓީމަށް ކާމިޔާބުކޮށްދިނީ މިއަހަރުގެ ޖެނުއަރީ ޓްރާންސްފާގައި އެޓީމާއި ގުޅުނު ފެނޫޑްގެ ކުރީ ފޯވާޑް ސެންތިއާގޯ ތޯމަސް ހިމެނޭޒް އެވެ.

ފެނޫޑުން މެޗުގެ ނަތީޖާ އެއްވަރުކުރި ލަނޑު ފަހުހާފުގެ 73 ވަނަ މިނެޓުގައި ކާމިޔާބުކޮށްދިނީ އެޓީމުގެ އާޖެންޓީނާ ފޯވާޑް ޖޫލިއަން ކަރަންޒާ އެވެ.