12 ވަނަ އެމްއައިބީ އިންޓަރ އޮފީސް ބިލިއަރޑް މުބާރާތުގެ ޓީމް އިވެންޓުގެ ފިރިހެން ޑިވިޝަންގެ ފައިނަލުގައި 2-0 ގެ ނަތީޖާއަކުން މޯލްޑިވްސް އިސްލާމިކް ބޭންކް (އެމްއައިބީ) ބަލިކޮށް ސްޓެލްކޯއިން މުބާރާތުގެ ޗެންޕިއަންކަން ހޯދައިފިއެވެ.

މުބާރާތުގެ ފައިނަލުން އެމްއައިބީ ޖާގަހޯދީ ސެމީފައިނަލް ފުރަތަމަ މެޗުގައި ވާދަވެރި ކުޅުމަކަށްފަހު 2-1 ގެ ނަތީޖާއަކުން އެމްއެންޑީއެފް ބަލިކުރުމަށްފަހު އެވެ. އަދި ސްޓެލްކޯ ފައިނަލުން ޖާގަހޯދީ ސެމީފައިނަލްގެ ދެވަނަ މެޗުގައި ވާދަވެރި ކުޅުމަކަށްފަހު ޓްރާންސް މޯލްޑިވިއަން އެއާވޭސް (ޓީއެމްއޭ) 2-1 ގެ ނަތީޖާއަކުން ބަލިކުރުމަށްފަހު އެވެ.

ފައިނަލުގެ ފުރަތަމަ ފްރޭމް ފަސޭހަކަމާއެކު 9-2 ގެ ނަތީޖާއަކުން ސްޓެލްކޯ އިން ކާމިޔާބުކުރި ނަމަވެސް ދެވަނަ ފްރޭމް އެޓީމުން ކާމިޔާބުކުރީ ވާދަވެރި ކުޅުމަކަށްފަހު 9-5 ގެ ނަތީޖާއަކުންނެވެ. އަދި މިއާއެކު މެޗުގެ ފުރަތަމަ ދެ ޓައި ސްޓެލްކޯ އިން ކާމިޔާބުކުރުމުން ތިން ވަނަ ޓައި ނުކުޅެ އެޓީމަށް ވަނީ މެޗު ލިބިފައެވެ. 

Advertisement

12 ފެބުރުއަރީ 2025 އިން 20 ފެބުރުއަރީ 2025 ގެ ނިޔަލަށް ނެޟަނަލް ބިލިއަރޑް ސެންޓަރުގައި ކުރިއަށް ގެންދިޔަ މިމުބާރާތުގައި ފިރިހެން ޑިވިޝަނުގައި 13 ޓީމަކުން ވާދަކުރިއިރު މިޑިވިޝަނުގެ މެޗުތައް ކުރިއަށް ގެންގޮސްފައިވަނީ ބައިވެރިވި 13 ޓީމު ދެ ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން އެންމެ ނަތީޖާ ރަނގަޅު ހަތަރު ޓީމު މުބާރާތުގެ ކުއާޓާ ފައިނަލަށް ވަނީ ހޮވިފައެވެ.