12 ވަނަ އެމްއައިބީ އިންޓަރ އޮފީސް ބިލިއަރޑް މުބާރާތުގެ ޓީމް އިވެންޓުގެ އަންހެން ޑިވިޝަން ފައިނަލުގައި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އާއި ބެންކް އޮފް މޯލްޑިވްސް (ބީއެމްއެލް) ކުޅުނު މެޗު ވާދަވެރި ކުޅުމަކަށްފަހު 2-1 ގެ ނަތީޖާއަކުން ކާމިޔާބުކޮށް ބީއެމްއެލް އިން މުބާރާތުގެ ޗެންޕިއަންކަން ހޯދައިފިއެވެ. 

އެސްޓީއޯ ފައިނަލުން ޖާގަ ހޯދީ ސެމީ ފައިނަލް ފުރަތަމަ މެޗުގައި 2-1 ގެ ނަތީޖާއަކުން ބީއެމްއެލް ބަލިކުރުމަށްފަހު އެވެ. އަދި ބީއެމްއެލް ފައިނަލުން ޖާގަހޯދީ ސެމީފައިނަލުގެ ދެވަނަ މެޗުން މޮޅުވި މޯލްޑިވްސް ކަސްޓަމްސް ސާވިސް އާއި ދެކޮޅަށް ކުޅުނު ތިންވަނަ ސެމީފައިނަލް 2-1 ގެ ނަތީޖާއަކުން ކާމިޔާބުކުރުމަށްފަހު އެވެ. އަދި މިދެޓީމު ލީގުބުރުގައި ކުޅުނު މެޗު 2-1 ގެ ނަތީޖާއަކުން ކާމިޔާބުކުރީ އެސްޓިއޯ އިންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ފައިނަލް މެޗުގެ ފުރަތަމަ ފްރޭމް 6-1 ގެ ނަތީޖާއަކުން ކާމިޔާބުކުރީ ބީއެމްއެލް އިންނެވެ. ނަމަވެސް ޖެހިގެން އައި ދެވަނަ ފްރޭމްގައި އެސްޓީއޯ މޮޅަށް ކުޅެ ފަސޭހަކަމާއެކު 6-0 ގެ ނަތީޖާއަކުން މި ފްރޭމް ކާމިޔާބުކޮށްފަ އެވެ.

މިއާއެކު މެޗުގެ ނަތީޖާނެރުމަށް ކުޅެވުނު ތިންވަނަ ފްރޭމުގައި ދެޓީމުގެ ފަރާތުން ވާދަވެރި ކުޅުމެއް ފެމިގެންދިޔައިރު، މިފްރޭމް ބީއެމްއެލް އިން ކާމިޔާބުކުރީ 6-3 ގެ ނަތީޖާއަކުންނެވެ. 

މިއަހަރުގެ މުބާރާތުގެ އަންހެން ޑިވިޝަނުގައި ފަސް ޓީމަކުން ވާދަކުރިއިރު، މިޑިވިޝަންގެ މެޗުތައް ކުރިއަށް ގެންގޮސްފައި ވަނީ ލީގު އުސޫލުންނެވެ. އަދި ލީގު ބުރުގެ ގަދަ ހަތަރު ޓީމު ސެމީ ފައިނަލަށް ހޮވުނު އިރު ސެމީގެ ފުރަތަމަ މެޗުގައި ލީގު ބުރުގެ އެއްވަނަ ޓީމާއި ދެވަނަ ޓީމު ވާދަކުރިއިރު، ދެވަނަ މެޗުގައި ވާދަކޮށްފައި ވަނީ ލީގުބުރުގެ ތިންވަނަ ޓީމާއި ހަތަރުވަނަ ޓީމެވެ.

ސެމީގެ ފުރަތަމަ މެޗުން މޮޅުވި ޓީމަށް މުބާރާތުގެ ފައިނަލުން ސީދާ ޖާގައެއް ލިބުނުއިރު، ފައިނަލްގެ ދެވަނަ ޖާގަ ލިބުނީ ސެމީގެ ފުރަތަމަ މެޗުން ބަލިވި ޓީމާއި ސެމީގެ ދެވަނަ މެޗުން މޮޅުވި ޓީމުގެ މެޗުގައި ތިންވަނަ ސެމީއެއް ކުޅެ މޮޅުވި ޓީމެވެ.