މޯލްޑިވްސް ސާފިން އެސޯސިއޭޝަން (އެމްއެސްއޭ) އިން ކޮންމެ އަހަރަކު ބާއްވަމުން އަންނަ ދިވެހި ސާފް ލީގަށް މުޅިން އާ އިވެންޓެއް މިއަހަރު އިތުރުކޮށްފިއެވެ.
އެމްއެސްއޭ އިން މިއަދު އިއުލާނުކުރި ގޮތުގައި ސާފް ލީގަށް މިފަހަރު އިތުރުކުރި އިވެންޓަކީ ލ. މާބައިދޫގައި ބޭއްވުމަށް ތައްޔާރުވަމުން އަންނަ "ކެރަންޑޫ" އިވެންޓެވެ. އަދި މި އިވެންޓް ސެޕްޓެމްބަރު މަހު މާބައިދޫގައި ބާއްވަން، އެ ރަށުގެ ކައުންސިލާއެކު އެމްއެސްއޭއިން ވަނީ އެއްބަސްވުމުގައި ސޮއިކޮށްފައެވެ. މިއީ ލ. އަތޮޅުގައި ދިވެހި ސާފް ލީގު އިވެންޓެއް ބާއްވާ ފުރަތަމަ ފަަހަރެވެ.
އެމްއެސްއޭ އާއި މާބައިދޫ ކައުންސިލާ ދެމެދުގައި އެއްބަސްވުމުގައި ސޮއިކުރުމަށް ބޭއްވި އިވެންޓުގައި އެމްއެސްއޭގެ ފަރާތުން ސޮއިކުރެއްވީ އެމްއެސްއޭގެ ރައީސް މުހައްމަދު ސޮބާހް އެވެ. އަދި މާބައިދޫ ކައުންސިލުގެ ފަރާތުން މި އެއްބަސްވުމުގައި ސޮއިކުރެއްވީ ކައުންސިލްގެ ރައީސް މުހައްމަދު ވިސާމެވެ.
ގުދުރަތީ ހިތްގައިމުކަން ލިބިފައިވާ މާބައިދޫ އުތުރު ފަރާތުގައިވާ ރާޅު ބްރޭކަކީ "މެޗިން"ގެ ނަމުންވެސް މަޝްހޫރުވެފައިވާ ރާޅު ޕޮއިންޓެކެވެ. ރާއްޖޭގެ އެންމެ ރީތި އެއް ރާޅު ޕޮއިންޓުގެ ގޮތުގައި ފާހަގަވެފައިވާ އެ ރާޅުގަނޑަކީ ގިނަ ސާފަރުން ޝައުގުވެރިވާ ވާރުގަދަ އަވަސް ރާޅުތަކެއް ހުންނަ ޕޮއިންޓެއް ކަމަށްވެސް އެމްއެސްއޭ އިން ބުނެފައިވެއެވެ.
މާބައިދޫގައި އިވެންޓް ހޯސްޓް ކުރުމުގެ އިތުރުން އެ ރަށުގައި ކުޑަކުދިންނަށް ހާއްސަ ސާފް އިވެންޓުތަކެއް ކުރިއަށް ގެންދިއުމަށާއި، ހުނަރުވެރި ސާފަރުން ހޯދުމުގެ މަސައްކަތް ކުރުމަށްވެސް އެމްއެސްއޭ އިން ސޮއިކުރި އެއްބަސްވުމުގައިވެއެވެ.
މީގެ އިތުރުން އެމްއެސްއޭ އާއި މާބައިދޫ ކައުންސިލާ ދެމެދު ވެވުނު އެއްބަސްވުމުގައިވާ ގޮތުން "ކެރަންޑޫ" އިވެންޓުގެ ޓައިޓަލް ސްޕޮންސަރަކީވެސް މާބައިދޫ ކައިންސިލެވެ.
Advertisement
This content is created and paid for by advertisers and does not involve Voice Journalists
