ބޭސް އުފައްދާ އެމެރިކާގެ ކުންފުންޏެއްކަމަށްވާ އެމްޖެން ކުންފުނިން އިންޑިއާގައި މިއަހަރު 200 މިލިއަން ޑޮލަރު އިންވެސްޓްކުރާނެކަމަށް އެކުންފުނިން ހާމަކޮށްފިއެވެ.

އެމްޖެން ކުންފުނިން މި ފައިސާ އިންވެސްޓްކުރާނީ މިހަފްތާގައި އެކުންފުނިން ބިންގާ އެޅި ޓެކްނޮލޮޖީ ސެންޓަރުގައެވެ. ހައިދަރުއާބާދުގައި ގާއިމްކުރާ މި ޓެކްނޮލޮޖީ ސެންޓަރުގައި، ބޭސް އުފެއްދުމަށް އާޓިފިޝަލް އިންޓެލިޖެންސް އަދި ޑޭޓާ ސައިންސް ބޭނުންކުރާނެއެވެ. މިއަހަރު ނިމޭއިރު މި މަރުކަޒުން 2000 ވަޒީފާ އުފެދޭނެކަމަށް ބެލެވޭއިރު، އެމްޖެން އިން މިހާތަނަށް 300 އެއްހާ މުވައްޒަފުން ވަނީ ނަގާފައެވެ.

އެމްޖެން ކުންފުނީގެ ސީއީއޯ ރޮބަރޓް ބްރެޑްވޭ ބުނީ އެކުންފުނިން އިންޑިއާގައި އިންވެސްޓްކުރުމަށް މަސައްކަތްކުރާތާ ދުވަސްތަކެއް ވެފައިވާކަމަށާއި، މިއީ އެކަން ކުރަން އެންމެ ރަނގަޅު ވަގުތު ކަމަށެވެ. މިއަހަރު 200 މިލިއަން ޑޮލަރު އިންވެސްޓްކޮށް، ކުރިއަށް އޮތްތަނުގައި އިތުރު އިންވެސްޓްމަންޓްތައްވެސް ގެންނާނެކަމަށް އެނާ ބުންޏެވެ.

Advertisement

އެމެރިކާގެ ބޭސް އުފައްދާ ގިނަ ކުންފުނިތަކުން އިންޑިއާގައި ކޮންމެވެސް ސިފައެއްގައި އިންވެސްޓްކޮށްފައިވާއިރު، އިންޑިއާގެ ބޭސް އުފައްދާ ކުންފުނިތަކުގެވެސް އެންމެ ބޮޑު އެއް މާކެޓަކީ އެމެރިކާއެވެ. އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ ވިޔަފާރީގެ ސިޔާސަތުތަކުގެ ސަބަބުން އިންޑިއާގައި އުފައްދާ ބޭސްތައް އެމެރިކާއަށް އެތެރެކުރާއިރު ބޮޑު ޓެރިފެއް ނަގައިފިނަމަ، މި ދެގައުމުގެ ވިޔަފާރީގެ ގުޅުމަށް އަސަރުކުރާނެއެވެ. އަދި އެ އަސަރު، ބޭސް އުފައްދާ ސިނާޢަތަށްވެސް ފޯރާނެއެވެ.

އެހެންނަނަމަވެސް، ދާދިފަހުން އިންޑިއާގެ ބޮޑުވަޒީރު ނަރެންދްރަ މޯދީއާއި، އެމެރިކާގެ ރައީސް ޓްރަމްޕް ބޭއްވެވި މަޝްވަރާތަކަށްފަހު، ޓެރިފްގެ މައްސަލައަށް ހައްލެއް އައިސްދާނެކަމުގެ އިޝާރާތެއް ކުންފުނިތަކަށް ވަނީ ލިބިފައެވެ.