މިވަގުތު ރާއްޖޭގައި ހިންގަމުން މިދަނީ ޣައިރު ގާނޫނީ ދައުލަތެއް، ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާޢީލް ވިދާޅުވެއްޖެއެވެ.
އެމްޑީޕީން ސަރުކާރާ ދެކޮޅަށް ސިލްސިލާކޮށް މަގުމަތީ ހަރާކާތްތައް ފަށަން ނިންމާފައިވާކަން އިއުލާން ކޮށް، ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ، މި ސަރުކާރު ވެރިކަމަށް އައިއިރު ވެސް މިއީ ރައްޔިތުންގެ ބާރުވެރިކަން ކަނޑުވާލައި ހުދުމުހުތާރު ވެރިކަމެއް ކުރުމުގެ މާޒީއެއް އޮތް ބައެއްކަން އެނގޭ ކަމަށެވެ.
އަދި އެމްޑީޕީން މަސައްކަތް ކުރީ ރާއްޖޭގެ ގާނޫނުއަސާސީ އާއި ޑިމޮކްރަޓިކް ނިޒާމުގެ ތެރެއިން ސަރުކާރަށް ފާރަވެރިވެ ޖަވާބުދާރީ ކުރުވުމަށް ކަމަށާ އެހެން ނަމަވެސް، މިއަދު ގާނޫނުއަސާސީ ފުނޑާލައި ތިން ބާރު ވަކިވެފައިވާ ވެރިކަމުގެ ނިޒާމު ޕީއެންސީން ހަރަބުކޮށްފައިވާ ކަމަށް އޭނާ ވިދާޅުވިއެވެ.
ކުރިއަށް އޮތީ ދަތި، އުނދަގޫ، ކަޅު ދުވަސްތަކެއް. މިވަގުތު ރާއްޖޭގައި ހިންގަމުން މިދަނީ ޣައިރު ގާނޫނީ ދައުލަތެއް، ވަކިން ހާއްސަކޮށް މުޅި ވެރިިކަމުގެ ނިޒާމު ފުނޑާލި މުއިއްޒުގެ ސަރުކާރަކީ ގާނޫނީ ތަރަހައިން ބޭރުވެފައިވާ ޣައިރު ގާނޫނީ ސަރުކާރެއް. ރައްޔިތުންނަށް އެ މީހުންގެ ބާރުވެރިކަން ކަށަވަރު ކުރެވޭނެ ނިޒާމީ އިންތިޒާމުތައް މި ޣައިރު ގާނޫނި ސަރުކާރުން ފުނޑުފުނޑުކޮށްފި.
ފައްޔާޒު އިސްމާޢީލް
މިއާއެކު ފައްޔާޒު ވިދާޅުވީ، އިދިކޮޅު ފަރާތްތަކަށް ދެން އޮތީ އެމްޑީޕީގެ ގައުމީ މަޖިލީހުން 10 ޑިސެމްބަރު 2024 ގައި ފާސްކޮށްފައިވާ ގަރާރާ އެއްގޮތަށް މަގުމައްޗަށް ނުކުތުން ކަމަށެވެ. އަދި މުޅި ވެރިކަމުގެ ނިޒާމު ”ހައިޖެކް ކުރުމަށް“ މި ސަރުކާރުން ކޮށްފައިވާ ކަންކަމާ މެދު މެދުކެނޑުމެއްނެތި އިހުތިޖާޖުކޮށް އަޑުއުފުލުން ކަމަށެވެ.
ފައްޔާޒު ވިދާޅުވީ، ރައްޔިތުންގެ ބާރުވެރިކަން އަލުން އިއާދަ ކުރުމަށް އެމްޑީޕީން ސިލްސިލާކޮށް ކުރިއަށް އޮތް ދުވަސްތަކުގައި ހަރަކާތްތައް ހިންގާނެ ކަމަށާ، މި ހަރަކާތްތަކުގައި ރާއްޖޭގެ ހުރިހާ ސިޔާސީ ޕާޓީއަކާއި، މަދަނީ ޖަމިއްޔާތަކާއި، ޑިމޮކްރަސީގެ ދިފާއުގައި މަސައްކަތް ކުރައްވާ އެންމެހާ ފަރުދުންނަށް ދައުވަތު އަރުއްވާ ކަމަށެވެ.
”މާތް الله ގެ ވާގިފުޅާއެކު މި އަނދިރި ދުވަސްތަކުގެ ތެރެއިން އަޅުގަނޑުމެން އަލިމަގެއް ހޯދާނަން.“ ފައްޔާޒު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
