ރަޝިޔާ އާއި ޔޫކްރޭނާ ދެމެދު ކުރަމުންދާ ހަނގުރާމައާ ގުޅިގެން އދ. ގައި މި ހަފުތާގައި ނެގި ވޯޓެއްގައި ޔޫކްރޭނަށް ތާއީދުކޮށް ރާއްޖޭން ވޯޓު ދިނުމަކީ ލިބިވަޑައިގެންނެވި ފަހުރެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވުމުން، އެކަމާ ރަޝިޔާއިން ރާއްޖެއަށް ކަނޑައަޅާފައި ހުންނަވާ ސަފީރު ލިވަން އެސް ޖަގަރްޔަން ހިތްހަމަޖެހިވަޑައިނުގެންނެވުމުން ސަފީރު އަރިހުން ނަޝީދު މަޢާފަށް އެދިވަޑައިގެންފިއެވެ.

މިދިޔަ ހޯމަ ދުވަހު ނެގި ވޯޓުގައި ރާއްޖޭން ވޯޓުން ލާފައިވަނީ، މި ހަނގުރާމައާ ގުޅިގެން ދިވެހި ސަރުކާރުން ހިފަހައްޓަމުން އައި ސިޔާސަތާ އެއްގޮތަށް ޔޫކްރޭނާ އެއްކޮޅަށެވެ.

އެކަމާއި ގުޅިގެން ނަޝީދު އެކްސްގައި ކުރެއްވި ޕޯސްޓެއްގައި ވަނީ، އެ ވޯޓުލީ ގޮތާމެދު އުފާ ކުރައްވާ ކަމަށާ، އަދި ޔޫރަޕްގެ ގައުމުތަކާ އެކު ރާއްޖޭން ވެސް އާންމު ވިސްނުމާ އެއްގޮތަށް، ވޯޓު ލުމުގައި ހިތްވަރާއި ދުރުވިސްނުން އިސްކޮށްފައިވާ ކަމަށް ވިދާޅުވެފައެވެ. 

ރަޝިޔާ ސަފީރު

އެކަމާ ގުޅިގެން، ސަފީރު ލިވަން އެސް ޖަގަރްޔަން ވިދާޅުވީ، ޔޫކްރޭނާ އެއްކޮޅަށް ރާއްޖޭން ވޯޓު ދިނުމަކީ ފަހުރެއްގެ ގޮތުގައި ނަޝީދު ސިފަކުރެއްވުމުން ވަރަށް ބޮޑު ހައިރާންކަމެއް ލިބިވަޑައިގެންނެވި ކަމަށެވެ.

އަދި ޔޫކްރޭނު ހަނގުރާމަ އަށް ސުލްހަވެރި ނިމުމެއް ގެންނަން މިހާރު ބަދަލުވެފައިވާ ވިސްނުމާ އެހާ ދުރުގައި ނަޝީދު ފަދަ ތަޖުރިބާކާރު ސިޔާސީ ބޭފުޅަކު ހުންނެވުމަކީ އެތައް ސުވާލެއް އުފެދޭ ކަމެއް ކަމަށާ، އެމެރިކާ އިން ވެސް ހަގީގަތާ އެއްގޮތް ސިޔާސަތަކާ ދިމާއަށް މިސްރާބު ޖަހާފައިވާއިރު، ނަޝީދު އިސްކުރައްވަނީ ޔޫރަޕުން ގެންގުޅޭ އަސްކަރީ ބާރުގެ ވިސްނުން ކަމަށްވެސް ސަފީރު ވިދާޅުވިއެވެ. 

"އަޅުގަނޑު ނަޝީދަށް ހަނދާންކޮށްދޭން ބޭނުންވަނީ، އަޖައިބެއް ފަދަ ޖަޒީރާ ރަށްތަކުގައި ޗުއްޓީ ހޭދަކޮށް، ރާއްޖޭގެ ބަޖެޓު ބޮޑުކޮށްދެނީ ރަޝިއާގެ ޓޫރިސްޓުން [ޔޫކްރޭނުގެ މީހުން ނޫން] ކަން،" އޭނާ ވިދާޅުވި އެވެ

ސަފީރު ވަނީ ރަޝިއާ އިން ރާއްޖެ އަށް ވަމުންދާ މިފަދަ އެހީތެރިކަން ބަލައިގަތުމަށް ނަޝީދުގެ އަރިހުން އެދިވަޑައިގެންފަ އެވެ.

ސަފީރުގެ އެ ޕޯސްޓާއި ގުޅިގެން ރައީސް ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ, "އެޑްވާންސިންގ އަ ކޮމްޕްރިހެންސިވް، ޖަސްޓް، އެންޑް ލާސްޓިންގ ޕީސް އިން ޔޫކްރެއިން" އަށް ރާއްޖެއިން ވޯޓު ދިނުމާ ގުޅިގެން އެމަނިކުފާނު ފާޅުކުރެއްވި ޝުޢޫރުތަކުން ރަޝިޔާގެ އެމްބެސެޑަރަށް ކަންބޮޑުވުން އުފެދުނު ކަމަށްޓަކައި މައާފަށް އެދިވަޑައިގަންނަވާ ކަމަށެވެ.

ރާއްޖެއަކީ ކުޑަ ޤައުމަކަށްވެފައި، ބަދަލުވަމުންދާ ޖިއޯޕޮލިޓިކަލް މާހައުލުގައި ޖެހެން ބޭނުން ނުވާ ކަމަށާއި، ރާއްޖެއިން އެ ޕޮޒިޝަން ނެގީ ކުޑަ ޤައުމެއްގެ ހައިސިއްޔަތުން އަބަދުވެސް ގެންގުޅޭ އުސޫލުގެ ދަށުން ކަމަށް ނަޝީދު ވަނީ ފާހަގަކުރައްވާފައެވެ. 

މީގެއިތުރުން ރާއްޖެއަށް ރަޝިޔާއިން ކޮށްދެމުންދާ އެހީތެރިކަމާއި، ޚާއްޞަކޮށް ފަތުރުވެރިކަމުގެ ދާއިރާއިން ރަޝިޔާގެ ފަތުރުވެރިން ކުރަމުންދާ ޒިޔާރަތްތަކަކީ ރާއްޖެއިން ވަރަށް އަގުވަޒަންކުރާ ކަމެއް ކަމަށް ނަޝީދު ވިދާޅުވެފައިވެއެވެ.

އަދި ރަޝިޔާގެ ރައީސް ޕުޓިންއަށާއި، ރަޝިޔާގެ ރައްޔިތުންނަށާއި، އެމްބެސެޑަރަށާއި އެ ބޭފުޅާގެ އާއިލާއަށް ރަމަޟާން މަހުގެ ތަހުނިޔާ ވެސް ވަނީ އަރިސްކުރައްވާފައެވެ.