ރަޝިޔާއާ ދެކޮޅަށް އެމެރިކާ އަސްކަރިއްޔާގެ ސައިބަރ އޮޕަރޭޝަންސް ކޮމާންޑުން ހިންގަމުންދާ އޮޕަރޭޝަންސް ހުއްޓާލުމަށް އެމެރިކާގެ ދިފާޢީ ވަޒީރު ޕީޓް ހެގްސެތު ނިންމަވައިފިއެވެ.

އެމެރިކާއިން ޒަމާނުއްސުރެ ރަޝިޔާއާމެދު ގެންގުޅެމުން އައި ސިޔާސަތު، ރައީސް ޑޮނަލްޑް ޓްރަމްޕްގެ ޒައާމަތުގައި ބޮޑުތަކުން ބަދަލުވަމުން އަންނައިރު، އެމެރިކާގެ އަސްކަރިއްޔާގެ މި ނިންމުމަކީ އެގޮތަށް އެކަން ނުކުރުމަށް ތަޖުރިބާކާރުން ބުނަމުން ދަނިކޮށް ނިންމި ނިންމުމެކެވެ. އެމެރިކާގެ ސައިބަރ ކޮމާންޑުން ރަޝިޔާއާ ދެކޮޅަށް ހިންގާ ސައިބަރ އޮޕަރޭޝަންސް ހުއްޓާލިނަމަވެސް، އެފް.ބީ.އައި، ސީ.އައި.އޭ އަދި ސައިބަރ ސެކިއުރިޓީ އެންޑް އިންފްރާސްޓްރަކްޗަރ އެޖެންސީއިން ހިންގަމުންދާ އޮޕަރޭޝަންތަކަށް މި ނިންމުމުގެ އަސަރެއް ނުކުރާނެއެވެ. އެހެންނަމަވެސް، ޖުމްލަކޮށް ހުރިހާ އިދާރާތަކުން ޑިޖިޓަލް އަދި ސައިބަރ ޙަމަލާތަކާ ދެކޮޅަށް ކުރާ މަސައްކަތް މަދުކުރުމަށް ޓްރަމްޕް ސަރުކާރުން ވަނީ ނިންމާފައެވެ.

ރަޝިޔާއާ ދެކޮޅަށް ހިންގާ ސައބަރ އޮޕަރޭޝަންތައް ހުއްޓާލުމަށް އެމެރިކާއިން ނިންމި ސަބަބެއް އަދި ސާފެއް ނުވެއެވެ. މިއީ ރަޝިޔާއާ ޔޫކްރެއިންއާ ދެމެދު ހިނގަމުންދާ ހަނގުރާމަ ހުއްޓާލުމަށް ރަޝިޔާއަށް ބާރުއެޅުމުގެ ގޮތުން އެމެރިކާއިން ނިންމި ނިންމުމެއްކަންވެސް ކަށަވަރު އަދި ނުވާކަމަށް އެސޯސިއޭޓެޑް ޕްރެސްއިން ބުނެއެވެ.