ފަޟީލަތުއްޝައިޚް އިސްމާޢީލުގެ ހަރަދުގައި ބިނާކުރާ މިސްކިތުގެ ބިންގާ އަޅައިފި އެވެ.
"މަސްޖިދު އުންމުލްމުއުމިނީން އާއިޝާ رضی اللہعنھا" ނަމުގައި ބިނާކުރާ މި މިސްކިތުގެ ބިންގާ އަޅުއްވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. ހުޅުމާލޭ ފުރަތަމަ ފިޔަވަހީގެ ވަގުތީ މިސްކިތް ކުރިން ހުރި ބިމުގައި ބިނާކުރާ މި މިސްކިތަކީ މަދީނާ އިންވެސްޓްމަންޓްގެ މެނޭޖްމަންޓުގެ ދަށުން އިމާރާތްކުރާ މިސްކިތެކެވެ.
މ. ޠައިބާ ޝައިޚް އިސްމާއީލު މުހައްމަދުގެ އެހީގައި ބިނާކުރެވޭ މި މިސްކިތަކީ ދެ ފަންގިފިލާއަށް އިމާރާތްކުރާ، ދެހާސް މީހުންގެ ޖާގައިގެ މިސްކިތެކެވެ. ރިސާޗް ލައިބްރަރީއަކާއެކު ބިނާކުރާ މި މިސްކިތުގައި އަންހެނުންނަށް ނަމާދު ކުރެވޭ ޖާގައަކާއި، އަންހެނުންނަށް ހާއްސަ ފާހާނާއެއް ވެސް ހިމެނެ އެވެ. އަދި މި މިސްކިތުގައި ކަރަންޓު އުފެއްދުމަށް ނިންމާފައިވަނީ، އިރުގެ ހަކަތަ ބޭނުންކޮށްގެންނެވެ.
މިއަދު ބޭއްވި ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދާއި، ޝައިޚް އިސްމާއީލު މުހައްމަދާއި އެމަނިކުފާނުގެ އާއިލާގެ މެންބަރުންނާއި، ދައުލަތުގެ ބައެއް ވަޒީރުންނާއި، ސަރުކާރުގެ އިސް އޮފިޝަލުން ވެސް ބައިވެރިވެވަޑައިގަތެވެ.
Advertisement
This content is created and paid for by advertisers and does not involve Voice Journalists
