ޕާކިސްތާނުގެ ހުޅަނގު އުތުރު ޚައިބަރުޕަޝްތުންޚުވާ ޕްރޮވިންސްގައި ހުންނަ އަސްކަރީ މަރުކަޒަކަށް ދެމީހަކު ހަށިގަނޑު ގޮއްވާލައިގެން ދިން ޙަމަލާއެއްގައި 12 މީހަކު މަރުވެ، 30 އަށްވުރެ ގިނަ މީހުން ޒަޚަމްވެއްޖެއެވެ.

ބައްނޫގައި ހުންނަ މި އަސްކަރީ މަރުކަޒުގެ ބޭރު ފާރުގެ ސެކިއުރިޓީ ފޫއަޅުވާލައި އެތެރެއަށް ވަދެ ދިން ޙަމަލާގައި މަރުވި މީހުންނާއި ޒަޚަމްވި މީހުންގެ ސީދާ އަދަދާއި ބެހޭ ގޮތުން ފުށުއެރުންތަކެއް އެބަހުއްޓެވެ. ޙަމަލާގައި ބައިވެރިވެފައިވަނީ ޕާކިސްތާން ޠާލިބާނުންގެ 2 މީހުންނެވެ. ޠާލިބާނުންނާއި ގުޅުން އޮންނަ ޖަމާޢަތަކުން ވަނީ ހަމަލާގެ ޒިންމާ ނަގައި، ޙަމަލާގައި ޕާކސްތާނު ސިފައިންގެ ގިނަ ބަޔަކު މަރާލެވިފައިވާ ކަމަށް ބުނެފައެވެ.

ސިފައިންގެ ބައެއް މަސްދަރުތަކާ ހަވާލާދީ އެސޯސިއޭޓެޑް ޕްރެސްއިން ބުނީ ހަށިގަނޑު ގޮއްވާލި ދެމީހުންގެ އިތުރުންވެސް އެހެން ބައެއް މީހުން މި ހަމަލާގައި ބައިވެރިވި ކަމަށާއި، އޭގެތެރެއިން 5 ނޫނީ 6 މީހަކު މަރާލެވިފާ ކަމަށެވެ. މި ހަމަލާ ދީފައިވަނީ އިއްޔެ ރޯދަ ވީއްލުމަށް އެންމެން ގެއަށް ދިޔަފަހުންނެވެ.

މިއީ ރޯދަ މަސް ފެށުނުފަހުން މިހާތަނަށް ޕާކިސްތާނުގައި ހަނގުރާމަވެރި ޖަމާއަތްތަކުން ދިން މިފަދަ 3 ވަނަ ޙަމަލާއެވެ.