ދިވެހިރާއްޖޭގެ ކޯޓުތަކުގެ ގާނޫނަށް އިސްލާޙް ގެނައުމުގެ ބިލު އަލުން ވިސްނެވުމަށް އެދިވަޑައިގެން އަނބުރާ ރައްޔިތުންގެ މަޖިލީހަށް، މިއަދު ފޮނުއްވައިފި އެވެ.
ސަރުކާރުން ވަނީ ސުޕްރީމް ކޯޓްގެ ފަނޑިޔާރުންގެ އަދަދު ހަތަކުން ފަހަކަށް މަދު ކުރަން ގާނޫނަށް ބަދަލު ގެނެސްފަ އެވެ. ގާނޫނަށް ބަދަލު ގެނައީ މަޖިލީހުގައި އޮތް ސުޕަ މެޖޯރިޓީ ބޭނުންކޮށްގެން ވަރަށް އަވަސް އަރުވާލައިގެންނެވެ. ބިލް މަޖިލީހަށް ހުށައެޅިތާ 24 ގަޑިއިރުގެ ތެރޭ ގާނޫނަށް ވަނީ ބަދަލު ގެނެސްފަ އެވެ.
ގިނަ ބައެއްގެ ކަންބޮޑުވުން އޮތް މި ބިލާ ގުޅޭގޮތުން ރައީސް އޮފީހުން މިރޭ ބުނީ އެ ބިލް ތަސްދީގު ނުކުރައްވާ އަލުން ވިސްނެވުމަށް އެދިވަޑައިގެން އަނބުރާ ރައްޔިތުންގެ މަޖިލީހަށް، މިއަދު ފޮނުއްވާފައިވާ ކަމަށެވެ.
ފަނޑިޔާރުންގެ އަދަދު މަދުކުރުމަށް ގާނޫނަށް ބަދަލު ގެންނަން ފާސްކުރީ ވޯޓުގައި ބައިވެރިވި 77 މެންބަރުންގެ ތެރެއިން 68 މެންބަރުން ވޯޓުންނެވެ. ބިލް ފާސް ކުރަން ނުފެންނަ ކަމަށް ވޯޓު ދެއްވީ 9 މެންބަރުންނެވެ.
މަޖިލީހުގެ ބޮޑު އަޣުލަބިއްޔަތަކުން މި ބިލް ފާސްކުރި ނަމަވެސް ތަސްދީގު ނުކުރައްވާ އަނބުރާ ފޮނުއްވާލެއްވީ ގިނަ ބައެއްގެ ކަންބޮޑުވުން އޮތުމުން ކަމަށް ބެލެވެ އެވެ.
ސުޕްރީމް ކޯޓްގެ ތިން ފަނޑިޔާރަކު ވެސް މިފަހުން ވަނީ ސަސްޕެންޑް ކޮށްފަ އެވެ. ސަސްޕެންޑްކޮށް ތުހުމަތުތަކެއް ކުރެއްވުމުން ފަނޑިޔާރު ހުސްނުއްސުއޫދު ވަނީ އިސްތިއުފާ ދެއްވާފަ އެވެ. ފަނޑިޔާރު ޑރ. އަޒްމިރަލްދާ ޒާހިރާއި ޑރ. މަހާޒް އަލީ ޒާހިރުއާ ގުޅޭ ދެ މައްސަލައެއް ޖޭއެސްސީން މިހާރު ވެސް ދަނީ ބަލަމުންނެވެ. އޭސީސީން ވެސް ދަނީ އެ ދެ ފަނޑިޔާރުންނާއި ގުޅޭ ތަހުގީގެއް ހިންގަމުންނެވެ.
ފަނޑިޔާރުން ސަސްޕެންޑް ކުރީވެސް އޭސީސީން އެ ތަހުގީގު ފެށުމުންނެވެ.
Advertisement
This content is created and paid for by advertisers and does not involve Voice Journalists
