ޔުއެފާ ޗެންޕިއަންސް ލީގު ރައުންޑް އޮފް 16 ދެވަނަ ލެގުގައި އަންގާރަ ދުވަހުގެ ރޭ އަމިއްލަ ދަނޑުގައި ޕީއެސްޖީ އަތުން ބަލިވެ ލިވަޕޫލް މުބާރާތުން ކަޓައިފިއެވެ.

މިދެޓީމު ޕީއެސްޖީގެ ދަނޑުގައި ކުޅުނު މެޗު 1-0 ގެ ނަތީޖާއަކުން ލިވަޕޫލް ކާބިޔާބުކޮށްފައިވާއިރު، ލިވަޕޫލްގެ ދަނޑުގައި ކުޅުނު މެޗު 1-0 ގެ ނަތީޖާއަކުން ކާމިޔާބުކުރުމުން 1-1 ގެ އެގްރިގޭޓް ނަތީޖާއަކުން ދެޓީމު ވަނީ އެއްވަރުވެފައެވެ.

މިއާއެކު އިތުރު ވަގުތުގެ 15 މިނެޓްގެ ދެހާފާއެކު 120 މިނެޓު ނިމުނީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި ޕީއެސްޖީ އިން ކުއާޓާ ފައިނަލަ ޔަގީންކުރީ ނަތީޖާ ނެރުމަށް ޖެހި ޕެނަލްޓީގައި ކުރިހޯދައިގެންނެވެ.

ލިވަޕޫލްގެ ދަނޑުގައި ކުޅުނު މިމެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ޕީއެސްޖީ އިން ވަނީ ފުރަތަމަ ހާފުގެ 12 ވަނަ މިނެޓުގައި ލަނޑެއް ކާމިޔާބުކޮށް މެޗުގެ ލީޑުހޯދާފަވެ. މިލަނޑު އެޓީމަށް ކާމިޔާބުކޮށްދިނީ ފޯވާޑް އުސްމާން ޑެމްބެލޭ އެވެ. އަދި މީގެ އިތުރުން ވެސް މިމެޗުގައި ދެޓީމުން ވެސް ވަނީ ލަނޑުޖަހާނެ ރަނގަޅު ގިނަ ފުރުސަތުތަކެއް ތަނަވަސްކޮށްފައެވެ.

ނަމަވެސް މެޗުގެ 90 މިނެޓުގެ ކުޅުން ހަމަވިއިރުވެސް ނަތީޖާއަކަށް އިތުރު ބަދަލެއް ނާދެއެވެ. މިއާއެކު 1-1 ގެ އެގްރިގޭޓް ނަތީޖާއަކުން ދެޓީމު އެއްވަރުވެ، ނަތީޖާ ނެރުމަށް 15 މިނެޓުގެ އިތުރު ވަގުތުގެ ދެހާފު ވަނީ ކުޅެފައެވެ. އަދި 120 މިނެޓުގެ ކުޅުމަށްފަހު، ނަތީޖާ ނެރުމަށް ޖެހި ޕެނަލްޓީގައި ލިވަޕޫލުން ޖެހި ތިން ޕެނަލްޓީގެ ތެރެއިން އެޓީމަށް ކާމިޔާބުކުރެވުނީ ސަލާހް ޖެހި ޕެނަލްޓީ އެކަންޏެވެ.

ލިވަޕޫލުގެ ކާޓިސް ޖޯން އަދި ޑާވިން ނުނޭޒް ކުރިއަށް ފޮނުވާލި ޕެނަލްޓީ ޕީއެސްޖީގެ ކީޕަރު ޑޮނަރުންމާ ވަނީ ހުޝިއާރުކަމާއެކު ދިފާއުކޮށްފައެވެ. އަދި މީގެ އިތުރުން ޕީއެސްޖީ އިން ޖެހި ހަތަރު ޕެނަލްޓީ ވެސް އެޓީމުން ވަނީ ކާމިޔާބުކޮށްފައެވެ.